Ich Ulreich von Albrechczhaym, burger ze Wels, und ich Ursula sein hawsfraw und mit sambt uns all unser erben veriehen und tun kunt offenlich mit dem brieff allen den, die in an sehent, hornt oder lesent, das wir mit wolbedachtem muet und mit guetem willen aller unser erben und nach rat unser nagsten vrewnt recht und redleich ze kauffen geben haben Hannsen dem Stayger, burger ze Wels, und seiner hausfrawn Elsspeten und allen iren payden erben unsern hoff mit aller seiner zwgehorung, genant der Chrewcz hoff gelegen in Talhaymer pharr ze nagst dem Cheller hoff, und ist erib von von dem goczhaws ze Lambach und dar zw die ekcher, die von alter durich recht dar zw gehornt und recht lehen sind von Wartenburkch, den selben hoff und ekcher mit allen ern, nuczen und rechten und wir den selben inne gehabt und genossen haben ze haws, ze hoff, holcz, veld, da nichcz awsgenomen, versucht und unversucht, also haben wir in das alles geben und ingeantwurt aws unser nucz und gewer in ir nucz und gewer umb ain gelt, des wir von in gancz und gar gericht und gewert sein, dar umb wir uns des egenanten hoffs und ekcher mit aller zwgehorung ganczleich furczicht getan haben, das wir noch unser erben noch ander nyemant nicht mer unsern wegen furbas dar nach nicht mer ze sprechen haben noch gewinnen weder mit recht noch an recht in chainer weis. Si schullen allen iren frum da mit schaffen mit verseczen, mit verkauffen, geben ungeirret, wen si wellent. Wir sein auch des egenanten hoffs und ekcher mit irer zwgehorung ze kauff ir recht gewern und furstand fur alle ansrpach, wo in des not und durfft geschiecht also kauffes, eribs, lehens und des lancz recht ist ob der Enns. Ging in dar an icht ab oder das in icht chrieg dar inn auf erstund von wem das war mit dem recht, den schullen wir in aws richten und richtig machen an ir mue und schaden. Tun wir des nicht was si denn des schaden namen den ir ayns oder irer erben ainer pey sein trewn und ayd und an alles recht gesprechen mocht, den selben schaden allen schullen wir in ab tun und wider chern gancz und gar, und schullen si das alles haben, dacz uns und unsern trewn dar zw auf aller unser hab, wo wir die haben oder lassen auf wasser oder lannde da nichcz awsgenomen, versucht und unversuecht. Mit urkunt des briefs, den wir in dar uber geben versigelten mit meinem egenanten Ulreichs von Albrechczhaym aygen anhangundem insigel und zu ainer zewgnuzz mit der erbern Hannsen des Kranfuezz die czeit richter ze Wels und Hainreichs des Churczen burger da selbs paider anhangunden insigel, die si paidew durich meiner vleizziger pet willen dar an gehangen habent, in paiden und iren erben an schaden. Der brieff ist geben nach Kristi gepurd drewzehen hundert jar und in dem syben und newnczkchisten jar am phyncztag vor sand Agnesen tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 445f, Nr. 377