Wir Simon von Gotes genaden abt ze Lambach uergehen vnd tun kunt offenbar mit dem brif allen, den er fürpracht wirt, daz wir mit wolbedachtem mut, als vns Vlreich Stökchel von Weiterswang sein eleich hawsfraw Margareth vnd ir paider eriben ermont habent, recht vnd redleich denselben lewten uerlichen haben irn tail auz dem gut ze Weyterswang gelegen in Gamparer pharr, dez sew von vnsern uordern pey nucz vnd gewer sitzent vnd ir veterleich vnd muterleich erib ist vnd etweuil, als vns chund ist vnd erweyst sein, mit chawft in ir gewalt komen ist, als sew dez, so uor berurt ist, nutz vnd gewer habent mit alle dem, daz durich recht vnd von alter ze irn tailn auz dem egenanten gut gehört (hat) vnd dauon bekomen mag ze holtz ze ueld ze wismad uersucht vnd unuersucht, vnd habent auch di eriben, di mitsampt in dartzu geeribt habent, gantz vnd gar betzalt vnd auzgericht in solicher beschaiden, ob ymant herfür köm, der pezzer erib ze den obgenanten tailen auz dem obgenannten gut ze Weyterswang wer dann der obgenant Vlreich sein eleich hawsfraw vnd ir paider eriben, der schol in geben achtzehen phunt Wyenner phennig in den negsten acht tagen uor Lichtmess oder hinnach in den negsten acht tagen. Wir offen auch, wer die obgenant grunt inne hat, der schol sew stiftleich vnd pewleich inne haben vnd schol man vns vnd vnserm gotzhaws allew jar ierleich von dem gantzen gut ze Weyterswang dinen vnd raichen an sand Michelstag sechzig Wyenner phennig; sew schullent auch dhain wandlung damit haben weder mit uersetzen noch mit uerchauffen noch mit dhainerlay weys an vnser hannt vnd guten willen vnd schullent auch allez daz dauon leiden vnd dulden, daz ander vnsers gotzhaws eribler gein vns vnd vnserm gotzhaws leident vnd duldent, vnd vnuertzigen vnsers gotzhaws rechten in allen sachen. Daz bestetigen wir also mit dem offen brief, versigelt mit vnserm anhangunden insigel, geben nach Christi geburde drewtzehenhundert jar darnach in dem syben vnd newntzigisten an sand Thomasabent.

Source Fulltext: OÖUB 11 (Wien 1983) S. 663-664