Wir Symon von Gotes genaden abpt ze Lambach vnd der gantz conuent desselben klosters uergehen vnd tun kunt offenbar mit dem brif allen, den er fürpracht wird, daz für vns komen ist Nicla Torper von Swans vnd hat mit wohlbedachtem mut mit aller seiner erben gutleichen willen vnd wart mit vnsrer hannt vnd mit gantzer stet recht vnd redleich ze chauffen geben sein drittail aus dem Aigen ze Lebrechtzhaim, das von vns vnd vnserm gotzhaws rechtz eribrecht ist vnd ist gelegen in Swanser pharr, seinem liben vettern Mertten dem Torper ze Lebrechtshaim seiner eleichen hawsfrawn Margarethen vnd allen ir paider eriben vmb ain gelt, dez sew gantz vnd gar von im bericht sind vnd bezahlt. So habent sew auch dez andern drittails auz dem obgenanten Aigen von vnseren uordern zenutz vnd gewer, also daz wir dem uorgenanten Mertten Törper seiner eleichen hawsfrawn vnd allen ir paider eriben ain drittail, daz ander im vnd seinen eriben besunder ze rechten eribrecht uerlihen haben, in solicher beschaiden, daz sew vns vnd vnserm gotzhaws allew jar dauon dinen vnd raichen schullent an sand Michelstag fumf Wyenner phenig vnd tzway hüner. Wir offen auch, wer daz obgenant gut inne hat, der schol dhain wandlung damit haben weder mit uersetzen noch mit uerchauffen noch mit dhainerlay weys an vnser hannt vnd guten willen vnd schol auch allez daz dauon leiden vnd dulden, daz ander vnsers gotzhaws eribler gein vns vnd vnserm gotzhaws leident vnd duldent vnd vnuertzigen vnsers gotzhaws rechten in allen sachen. Daz bestetigen wir also mit dem offen brif versigelt mit vnsern paiden anhangunden insigeln, geben nach Christi geburt in dem achtvndnewntzigisten an Phintztag uor Uasnacht.

Source Fulltext: OÖUB 11 (Wien 1983) S. 677-678