Dem wolwirdigen weysen herren hern Simon abt cze Lambach embeut ich Vll Schreiber ze Linz mein stat willig dinst. Herr, vmb daz gut genannt ze Odd, daz ich von ewern genaden ze lehen hab, daz hab ich von meiner notdurfft verchauffen mussen vnd hab das ze chauffen geben Fridreichen dem Weber gesessen ze Odd vnd sent ewern genaden di gewer des selben gucz vnd di lehen auf mit dem gegenburtigen brif vnd pit ewer genad, daß jr dasselb gut gerucht ze leichen dem egenanten Fridreichen dem Weber vnd im daruber an stat mein vnd meiner hawsfrawn Margrethen vnd meins stephsun Chunrad des Tanynger nach ewers gotzhaws rechten statt tutt, das wir daz verschauffen des egenanten gucz, also getan haben. Versigelt mit des erbern weisen Hannsen des Chranfuzz di zeit richter ze Wels insigel, den wir alle drew darumb gepeten haben, im an schaden. Geben an Phincztag in der ersten vastwochen in dem acht vnd newnczkisten jar.

Source Fulltext: OÖUB 11 (Wien 1983) S. 679-680