Ich Weikart der Trunt ich Michel Lerbüller vnd ich Hanns Kremsdorffer veriehen vnd tun kunt offenbar mit dem briff allen, den er fürpracht wirt, daz vns chunt vnd gewissen ist, das die güter ze Niederentarn ze Roswang ze Haslech vnd ze Puchleiten, darvmb der erwirdig geistleich herr abbt Symon ze Lambach an ainem tail vnd Chunrat von Erphenhofen, Wernhart Lazzer von Roswank, Chunrat Fökkel von Entarn, der Vormair von Altenhofen, Ott von Altenhofen, Peter ze Haslech, Wernhart vnd Chunrat daselbs, Hanns Welkleins pruder an dem hoff vnd Nicla Sneider an dem andern tail stössing sind, das dieselben güter ze dem gotzhaus ze Lambach gehornt vnd sind im auch alle jar iärleich dinstper vnd die lewt, die auff denselben gütern gesessen sind, habent vor der zeit, als sie den krieg mit dem vorgenanten geistlich herrn abbt Symon habent angeuangen allweg als lang wir gedenken, all wandlung mit versetzen vnd mit verkaufen mit ains abbts ze Lambach hant gehabt, stewr geben, ehaft taiding in des vorgenanten gotzhaus schrannen besucht vnd alles das tan, das ander des gotzhaus ze Lambach lewt demselben gotzhaus schuldig sind. Daz ist vnser gewissen vnd sprechen ez pey vnsern trewen. Mit vrchund des briffs versigelt mit vnser aller dreyer, als wir an dem anuang des brieffs mit namen geschrieben sein, aufgedruckten insigeln. Geben nach Christi gepurde drewtzehenhundert jar darnach in dem newnvndnewnczigisten jar an sand Luceintag.

Source Fulltext: OÖUB 11 (Wien 1983) S. 878