Ich Chunrad von Czaiczolting, ich Andre Selflies, ich Hanns Pusinger, Hanns Swentner, Nicla von Pusing, Walchun Schuster von Geboltskirchen, Nicla von Czaiczolting, Walchun von Edming, Ditmar von Sikhing, Chunrat von Holczing, Hainrich Stedel von Czaiczolting, Hanns Golhafer von Lengaw, Hainrich Trawner, Hanns von Marschalching, Michel von Aigen, Ludel von Talhaim, Ulrich von Swennt und Hanns Schuster von Puchleiten verichen vnd tun chunt offenbar mit dem brieff allen, den er furpracht wird, das vns chund vnd zewissen ist vmb die guter ze Nidernentarn ze Roswank ze Haslech vnd ze Puchleiten, darumb der erwirdig geistleich herr abbt Symon ze Lambach an ainem tail vnd Chunrat von Erphenhoffen, Wernhart Lasser von Roswanck, Chunrat Fökkel von Entarn, der Vormair von Altenhofen, Ott von Altenhofen, Peter ze Haslech, Wernhart und Chunrat dasselbs, Hanns, Welkleins pruder an dem Hoff vnd Nicla Sneider an dem andern tail stössig sind, das dieselben güter ze dem Kloster ze Lambach gehörnt vnd sind im auch järlich pflichtig ze dienen vnd auch dinstpar vnd haben auch allweg die lewt, die auff den uorgenanten gütern gesessen sind, für Lambecker gehabt, das sprechen wir alle vnd yekleicher besunder bei vnsern trewn. Mit vrchund des priffs versigelt mit der erbern weisen Vlreichs Asenheimer vnd Petern des Anhanger von Cheppach paider auffgedruckten insigeln, die sew durch vnser fleissiger pett willen in paiden vnd allen irn erben an schaden auff den briff gedruckt habent, wann wir derzeit aigen insigel nicht enheten, verpinden wir vns hinder die vorgenanten zwai insigel mit vnsern trewn in aidesweis, alles das statikleichen hinfür ze uerhelen vnd ze sprechen, das in dem briff begriffen ist. Geben nach Christi gepurt drewtzehenhundert iar darnach in dem newnvndnewnczigisten jar an sand Clemententag.

Source Fulltext: OÖUB 11 (Wien 1983) S. 870-871