Wir Erasm von Gots gnaden abbt ze Lambach und der ganntz convent desselben klosters vergehen und tun kunt offenlich mit dem prieff allen den, so er furpracht und geczaigt wirt, das fur uns chomen sind Ulreich in dem Nestt, Kathrey und Elspeth, alle drew geswistred, und Perichtolds von Pabenperig kinder, und haben mit wolbedachtem mut und veraintem rat und mit willen aller irer eriben und nagsten und peiten freunt, mit unser hannt und mit ganntzer stat recht und redleich verkaufft ze einem rechten kauff ir virtail auz dem gut, genant ze dem Nydern haws, gelegen ze Pubendorff in Puchler pharr, daz ir rechts eribrecht von uns unserm gotshaus ist, und haben ez ze kauffen geben Thoman von Pawenperig, Agnesen seiner hausfrawen, der vorgnanten dreyr geswistred rechte swester, und ir paider eriben umb ein gelt, des sew ganntz und gar von in verricht, gewert und beczalt sein ze rechten tagen an schaden. Also haben wir dem benanten Thoman, Agnesen seiner hausfrawen, und ir paider eriben daz benant virtail mit aller seiner zugehorung ze einem rechten eribrecht verlihen und ingeantwurt in ir nutzz und gewer mit allen eren, nutzzen und rechten, so von altar und durich recht darzu gehort und davon bechomen mag ze haws, ze hoff, ze hofmarich, ze holtz, ze veld, ze wismad, ze waid, versucht und unversucht, nichts ausgnomen in der beschaiden, das sew uns und unserm gotshaus jarleichen und alle jar davon raichen und dynen sullen an unser frawen tag ze der dinst zeit dreyssigk new Wienner phenig und ein hun, und an sant Jorigentag drythalben Wienner phenig ze vogtstewr. Ez sind auch die obgnanten Ulreich, Kathrey, Elspeth geswistred mit sampt allen iren eriben des benanten virtails mit aller zugehorung ze rechten kauff Thomans, seiner hausfrawen und eriben ir recht geweren und furstandt fur all ansprach alz offt in des mit recht, not und durfft geschiecht, also rechts kauffs nach des lannds recht ist ob der Enns. Wir offen auch, das sie aber dhainerlay wandlung damit nicht sullen haben, weder mit versetzzen, noch mit verchauffen, noch in ander dhainerlay weise an unser hannt und guten willen, und sullen auch alles das davon leiden und dulden gen uns und unserm gotshaus, das ander unsers gotshaus eribler gen uns leident und duldent unvertzigen unsers gotshaus rechten in allen sachen. Und des alles ze urchund geben wir den prieff, versigelt mit unserm und unsers convents paiden anhangunden insigeln, und beschehen ist nach Christi gepurt virtzehenhundert jar und dar nach in dem achten jar an suntag Quasimodo geniti nach Ostern.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 621f, Nr. 505