Dem erwirdigen geistleichen unserm genedigen herren herren Erasem, abt ze Lambach enpewten wir ich Jorg auff der Walthering und ich Margret, seinn hawsfrawn unser willig dinst. Wier lassen ewer genad wissen, das wir zekauffen geben haben Symendel von Strass, seiner hawsfrawn und irn erben unser gut, genant Walthering, gelegen in Lambacher pharr, das unser eriblehen gewesen ist von ewerm goczhaws und ewern genaden, bitten wir ewer genad mit allem vleis von unser und unser eriben wegen; das ir dem obgenanten Symendel von Strass, seiner hawsfrawn und irn erben das obgenant gut Walthering verleihen wellet, das wellen wir umb ewer genad gern verdienn, wann ir das tan habt, so geben wir ewern genaden von unser und unser erben wegen die lehenschaft des benanten guts auff. Mit urchund des brieffs, den wir ewern genaden daruber geben, besigelten mit des ebern Chunrad des Awoldinger, burger ze Wels, aufgedrukten insigel, den wir mit vleis darumb gepeten haben, im und allen seinen erben an schaden. Der brieff ist geben des eritags nach sand Fabiani und Sebastiani tag nach Kristi gepuerde vierczehenhundert jar und darnach in dem newnten jare.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 631f, Nr. 512