Wir Jacob von Gots gnaden abbt ze Lambach bekennen mit dem brief, das der erber Wolfgang Katringer mit unser gunst und willen sein eliche hausfrawen Elspeten die Grueberin umb ein benante sum gelts geweiset hat fur ir heiratgut und morgengab in satzzes geweise auf haws und hofmarich mit aller zugehorung ze Lambach im purkfrid gelegen auf der Trawnleiten za nagsten des Pawswecken haws und auf dem gut ze Guckenperig, das von unserm gotshaus rechts lehen ist, gelegen in Lambecker pharr, also das sie und ir erben auf dem egnanten haws, hofmarich ze Lambach und auf dem gut ze Guckenperg ir heiratgut und morgengab haben und die nyssen und nutzzen sullent also heiratguts, morgengab satzzs purkrechts und lehens nach des lannds recht ist ob der Enns unvertzigen und unvergessen des jartags jarlichen und alle jar, der auf dem benanten haws und hofmarich gestift ist, in unsers convents oblay und ungolten uns und unserm gotshaus an unserm purkrecht jarlichen und an der lehenschaft des benanten guts. Mit urchund des priefs den wir geben versigelt mit unserm anhangundem insigel und beschehen ist nach Christi geburde viertzehenhundert jar und darnach in dem sechtzehenten jar an freytag vor sand Mathias tag des heiligen zwelifpoten.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 3-4, Nr. 603