Ich Peter Spanner und ich Stephan Spanner wir gepruder und unsrew geswystret und all unserr erben wir enpieten unserm genadigem herrn herrn Jacoben abpt ze Lambach unserr willig gehorsam dinst. Wir lassen ewr genad wissen, daz wir ze chawffen haben geben unserm lieben vettern Albrechten dem Spanner und allen sein erben unsern hoff cze Frahaim gelegen in Wydemspekcher pharr und ist eriblehen von dem erwirdigen goczhaws cze Lambach. Den benanten hoff mit aller zugehorung haben wir in ze chawffen geben drew gancze jar umb sechczikch phunt phening awf ain redleichen widerchawff, und den widerkawff schol ich Peter Spanner selber tun und nyemancz anders umb dy lx lib. den. Und waz er darauf legt und in gestet gein ewern genaden und anders, wo daz mit einer gewissen geschiecht, daz soll ich ym auch widerchern. Und der widerchawff schol geschehen nach den vergangen drin jarn vor liechtmezz xiiii tag oder hinnach in den nachsten xiiii tagen. Pitten wir ewr genaden, daz ir ym und sein erben daruber stat tuet nach seiner begerung mit ewerm prief und insigel, daz ist alles unser gutleich will und wort. Mit urchundt des offen priefs, versiglten mit dez erbern Wernharten dez Rinderholczel dy zeit amptman in der vogtay ze Welz aygen aufgedrukchten insigel, den wir mit fleizz darumb gepeten habem, ym und allen sein erben an schaden, darunder wir uns verpinten mit unsern trewn an aydes stat stat ze haben und geschriben stet an dem prief der geben ist des erichtags nach goczleichmanstag anno Domini etc. xviiimo.