Ich Sigmund Mecz bekenn fur mich, mein hawsfrawn und fur all mein eriben, das ich wolbedechtlich nach meiner nachsten frewndt rat, will und gunst rechtleich ze kauffen geben und ingeantburt hab mit herren hannt und aller stat aws meiner und aller meiner eriben gewalt, nucz und gewer ledichleich mit rechter furczicht in Thomans des Smids ze Puchkirichen, Anna seiner hawsfrawn und in ir paider eriben gewalt, nucz und gewer die czway tail des guets ze Mitterleb, genant das Pawngartlehen, meins rechten mueterleichen eribs in Puechkiricher pharr gelegen, des erwirdigen gotshaws ze Lambach eriblehen und dienstpar guet, mit allen den eren, rechten und nuczen, so ungeverlich darczu gehornt, nichts hindangesaczt umb ain summ gelts, des ich zw rechter zeit an allen abgankch und schaden von in genczleich awsgericht und peczalt pin mit der beschaiden, das sy nu furbaser mit den obgenanten zwain tailn des guets ze Mitterleb ierer zugehorungen allen ieren frumm schaffen, versetzen, verchauffen und ledichleich damit hanndeln schullen und mugen, als kauffs und lannds in Osterreich ob der Enns recht ist. Ich und mein eriben seinn des benanten kauffs ir recht gewern und furstand fur all chrieg und ansprach, wo in des notdurfft beschiecht mit dem rechten nach lanndesrechten in Osterreich ob der Enns angeverd. Gieng in aber an der gewerschefft und kauff icht ab mit recht, wietan scheden sy des nement, die schullen sy haben und pechomen zwsambt dem haubtguet, so sy nachst mugen, dacz mir, meinen eriben und darczu auff aller unserr hab unverschaidenleich nach lanndesrechten in Osterreich ob der Enns angeverd. Cze urkund des prieffs mit meinem aigen anhangunden sigill und zw pesser sicherhait und zeugnuss hab ich mit vleiss gepeten den edeln Larenczen Otstorffer mit seim sigill als ain zeugen der sach, iem und seinn eriben an schaden. Geben nach Krists gepurd vierczehenhundert darnach im achtundczwainczigisten jaren an sand Veitstag.