Wir Johanns von Gotes genaden abbt ze Lambach bekennen mit dem brief, das fur uns komen ist Chunigund, Helmharten des Mullner ze Dikchach seligen witib und hat mit wolbedachtem muet und guetem willen irer eriben rechtt und redleich verkawft all ir gerechtigkayt, so sy gehabt hat an der mul ze Dikchach mit aller irer czuegehorung, gelegen in Urschenhaymer pharr, Haynreichen dem Rinndrer ze Ekchenperg und Hannsen dem Chinndel an dem Heyfeld und iren eriben umb ain summ gelts, des sy gantz ausgericht und beczalt ist. Also haben wir in den benanten Hainreich dem Rinndrer und Hannsen dem Chinndel und iren eriben dew egemelten gerechigchait an der benanten mul bestatt und verlihen zu rechttem eribrecht mit alle den ern, rechten und nuczen, so dann von allter und durch recht darczue gehornt oder da von bechommen mugen, nichts auesgenomen in der beschayden, das sew uns und unserm gotshaws alle jar jarlich dienn und rayhen sullen nach inhaltung unnsers gotshauss urbarbuechs. Es ist auch die obgenant Kunigund und ir eriben der egemelten gerechtigkayt der egenanten Hainreich und Hannsen und irer eriben ir rechtter gewer und furstand fur all rechtleich ansprach, als offt in des mit recht, not und durft geschiecht, also dann solichs kawffs, eribrecht und landts ob der Ens recht ist. Wir offen auch, das sy chain wanndlung da mit haben sullen in chainerlay weys an unser handt und gueten willen, und sy schullen auch alles das da von leyden und dulden, das ander unsers gotshawss eribler gein uns leiden und dulden unverczigen unnsers gotshawss rechten in allen sachen. Des ze urchund geben wir in den brief, besigelten mit unserm anhangunden innsigel, des gegeben ist nach Kristt geburd vierczehen hunndert jar und in dem ains und dreyssigissten jare am nagsten sammbcztag vor Oculi inn der vassten.