Wir Albrecht von Gotes gnaden herczog ze Osterreich, ze Steir, ze Kernden und ze Krain, markgraf ze Merhern und grave ze Tirol etc. bekennen, als die erber Barbara weilent Andren des Awer witib ain phunt und fumf Wienner phennig gelts ze Mitternrewtt auf ainem gestiften und auf ainem ungestiften oden lehen gelegen, die ir lehen von uns gewesen sind der lehenschaft von Liechtenvels, zu der kirchen dacz Fridreichspach gegeben hat, daz wir zu vordrist durch Gott und auch der egenanten Barbaren vleizzigen pet willen unser willen und gunst darczu gegeben und die egemelten gult zu der vorgenanten kirchen von sundern gnaden geaignet haben, und aignen auch von furstleicher macht wissentlich mit dem brief, was wir zu recht daran aignen sullen oder mugen, also daz dieselb gult nu furbazzer ewicleich bey der egenanten kirchen beleibe und gehalten werde als andere aigne guter, die zu derselben kirchen gehornt und als aigner, guter und lanndsrecht ist. Wir ver[czei]hen uns auch der manschaft und lehenschaft, die wir darauf gehabt haben ungeverleich. Mit urkunt des briefs geben ze Wienn an phincztag nach sant Paulstag conversionis nach Kristi gepurde vierczehenhundert jar und darnach in dem fumfunddreissigisten jare.