Wir Johanns von Gottes genaden abbt ze Lambach bekennen mit dem brief, das fur uns komen ist Ulreich Sunlewtter mit ainem besigelten brief uber das hernach benant guet und besigelt heten Mertt Wufinger und Ulreich Stern, das unmugleich beschechen was. Also hat man der benant Sunlewtter mit wolbedachtem mut und guetem willen recht und redleichen verkaufft das guet ze Nidernpuechlewtten mit sein zuegehorungen, so von altter und durch recht darzugehort, nichts darinn ausgenomen noch hindangesaczt angever, und ist gelegen zenagst Jorigen des Wufinger gut in Schondorffer pfarr und ist erbrecht von uns und unserm gotshaws, Kathrein, Hainreichs des Eysenpunkch seligen hawsfraw und Hannsen des Rostawscher von Sikking seligen tachtter und irn erben umb ain sum gelts, des sy gancz und gar ausgericht und beczalt sind worden zu rechtten tagen an allen schaden. Also haben wir ir der egemelten Kathrein und irn erben das egemelt gut ze Puechleyttn mit sein zuegehorungen angever bestett und verlichen zu rechttem kauf und eribrecht in solcher beschaiden, das sy uns und unserm gotshaus all jar jerleichen davon raichen und dienn sullen zu sannd Michelstag czechen Wienner pfening und ain huen. Es ist auch der obenant Ulreich Sunleytter und sein erben des egemelten guts ze Puechlewtten mit sein zuegehorungen der benanten Kathrein und irer eriben ir recht gwern und furstant fur all rechtleichew ansprach, als dann soleichs kaufs, eribrechts und lantz ob der Enns recht ist. Wir offen auch, sy sullen kain wanndlung damit nicht haben in chainerlay weys an unser hanndt und guetem willen, und sullen auch alles das davon leyden und dulden, das annder unsers gotshauss eribler gein uns leydent und duldent unverczigen unsers gotshauss rechten in allen sachen. Des ze urkund geben wir in den offenn brief, besigeltem mit unserm anhanngundem insigel, der geben ist nach Christi geburd im vierczechenhundertistem und in dem funffunddreissigisten jaren am freytag nagst nach Judica in der vasten.