Wir Johanns von Gotes genaden abbt ze Lambach bechennen an dem brief, das fur uns kommen ist Stephan Purkcholczer und hat mit wolbedachtem muet und guetem willen ubergegeben den halben hof ze Linnttech mit aller seiner zuegehorung, gelegen in Mekchenhofer phare, seynem lieben sun Kuenrad. Derselb Chuenrad hat den yecz gemelten hoff rechtt und redleich verkawfft Hannsen dem Goppel an der strass, seiner hausfraw Dorothee und iren bayden eriben, dye sy yeczund miteinander haben oder noch gewingen, umb ein summ gelts, des er gants beczalt ist. Also haben wir den yecz benanten Hannsen, seiner hawsfrawn Dorothee und iren bayden eriben den gemelten halben hof mit seiner zuegehorung, so von allter und durch recht darczue gehort oder davon bechomen mag, darinn nichts ausgenomen angever, verlihen und bestett zu rechtem eribrechtt in der beschaiden, das sy uns und unserm gotshaus alle jar davon dienn sullen an unser frawntag funfundsybenczikg new Bienner phenning, zu dem brehentag funfczehen phenning, zu sand Jorgentag achtthalben phening und drew huenr. Es ist auch der benant Purkcholczer und all sein eriben des gemelten hofs des benanten Hannsen, seiner hawsfraun und irer baider erben ir rechtt gewern und furstand fur all rechtleich ansprach, als dann solichs kauffs, eribrechts und lants ob der Ens recht ist. Wir offen auch, das sy chainerlay wandlung damit haben sullen in chainer weis an unser hannt und gueten willen, und schuellen auch alles das davon leyden und dulden, das ander unsers gotshauss eribler gein uns leident unverczigen unsers gotshauss rechten in allen sachen. Ze urkund geben wir in den brief, besigelten mit unserm anhangunden insigel, der geben ist nach Krist geburd vierczehenhundert jar und dar nach in dem funfunddreyssigistten jare an mantag nach sand Jacobstage des heyligen zwelfpoten.