Wir Johanns von Gotes genaden abbt ze Lambach bechennen, das fur uns kommen sind Ulreich zu Niderntopel und Jorig von Seling und habent miteinander veraintleichen und mit guetem willen irer baider eriben rechtt und redleichen verchaufft ain landt genantt das salczlantt gelegen in unser pharr zenagst hinan an praytenperger veld Hanns dem Schuester, Anna seiner hausfrawn und iren baiden eriben umb ain gelt, des sy gantz beczalt sind. Also haben wir in den benanten Hannsen, seiner hawsfrawn Anna und iren baiden das gemelt lant mit aller seiner zuegehorung, so von allter und durch recht darczue gehort, darinn nichtz ausgenommen angever verlihen und bestett zu rechttem eribrecht in der beschaiden, das sy uns und unserm gotshaus alle jar davon dienn sullen nach inhalttung unsers urbar. Es sind auch dy obgemelten Ulreich und Jorig und ir eriben des gemelten lannts und aller zuegehorung des benanten Schuester, seiner hawsfrawn und irer bayder eriben ir rechtt gewern und furstand fur all rechtleich ansprach, als dann solichs kauffs eribrechts und lants ob der Enns recht ist. Wir melden auch, das sy chainerlay wandlung damit haben sullen in chainer weis an unser handt und gueten willen, und sy sullen auch alles das davon leyden und dulden, das ander unsers gotshaus eribler gein uns leydent unverczigen unsers goczhaus rechten in allen sachen. Ze urchund geben wir in den brief, besiglten mit unserm anhangunden insigel, der gegeben ist nach Krist geburd vierczehenhundert jar und darnach in dem funfunddreissigisten jar an sambcztag vor sand Bartholomaeus tage.