Reverendissimo in Christo patri ac domino domno Leonardo dei et apostolice sedis gratia episcopo Pataviensis cum sui humilima recommendacione ac oracionum devocione obedienciam et reverenciam debitam et condignam. Sacris canonibus novimus esse cautum, ut ultra tres menses prelato proprio kathedralis sive regularis non vacet ecclesia, ne pro defectu pastoris lupus rapax gregem invadat dominicum aut in suis facultatibus ecclesia viduata grave dispendium paciatur. Eapropter bone memorie venerabili in Christo patre ac domino domno Johanne olim abbate nostri monasterii Lambacensis vigesimasecunda die mensis marci de anno presenti, sicut domino placuit, ab hac luce subtracto et corpore ipsius, prout moris est, ecclesiastice tradito sepulture, nos fratres conventuales dicti monasterii Lambacensis infra propriis nominibus ac manibus annotati et subscripti, qui eleccioni debuerunt interesse primum iuxta decretum eleccionis sacrosancte synodi Basiliensis in ecclesia convenientes missam de sancto spiritu sollempniter decantantes, nichilominus quolibet nostrum insequesito missam celebrantes ad locum eleccionis ingressi, videlicet refectorium sepedicti nostri monasterii supplicavimus unanimiter venerabili in Christo patri ac domino domno Jacobo abbati monasterii in Krembsmunster, quatenus ad tractandum de eleccionis negocio nostro capitulo presideret, quo annuente, omnes et singuli in eius manibus iuravimus iuxta formam dicti decreti sacrosancte synodi antedicte. Post hoc tractare cepimus de futuri abbatis eleccione, habitis tractatibus et matura deliberacione super eis tandem placuit nobis universis et singulis per viam compromissi nostre viduate ecclesie providere dedimusque potestatem dicto venerabili in Christo patri ac domino domno Jacobo abbati monasterii sancti Agapiti in Krembsmunster, coadiunctis sibi duobus fratribus de nostro conventu, videlicet fratre Hainrico et fratre Udalrico primo, ut iidem vel maior pars ipsorum vice sua et nostra auditis prius votis singulorum per eleccionem canonicam ecclesie nostre de persona ydonea ex nostro tamen gremio providerent, ita quod unus ipsorum de consensu aliorum vice sua et collegarum et nostra illum, in quem conveniret, eliget et eleccionem sollempniter in nostra presencia publicaret. Qui venerabilis in Christo pater et dominus domnus abbas in Krembsmunster iam sepe nominatus primum iurans iuxta formam dicti decreti sacrosancte synodi sepedicte, coassumptis secum suis collegis videlicet fratre Hainrico et fratre Udalrico primo prius iuratis, secedentes in partem vota singulorum requisierunt. Quibus auditis et deliberacione inter se habita in fratrem Thomam de Retcz, priorem dicti nostri monasterii unanimiter, ut nobis retulerunt, nemine eorum dicrepante convenerunt virum utique plene et mature etatis, utpute, qui iam tricesimum annum attingit vel exegit, virumque sufficientem et ydoneum de matrimonio susceptum legittimo, sacerdocii dignitate preditum, moribus, vita et litterarum sciencia merito conmendandum, quem dictus venerabilis in Christo pater et dominus domnus Jacobus abbas in Krembsmunster secundum formam compromissi in hunc modum elegit. Ego frater Jacobus, abbas monasterii sancti Agapiti in Krembsmunster ordinis sancti Benedicti, anno Domini millesimo quadringentesimo trigesimo sexto, die vigesima octava mensis marcii, de voluntate et consensu collegarum meorum, in quos compromissum est, a venerabili et religioso juius monasterii conventu vice mea et ipsorum et omnium aliorum ius in eleccione habencium et hic presencium auctoritate michi et meis collegis concessa, fratrem Thomam de Retz priorem eligo in abbatem huius monasterii et ipsam eleccionem sollempniter in hiis scriptus publico in conmuni, in nomine patris et filii et spiritus sancti amen. Dictam vero eleccionem sic canonice celebratam et sollempniter publicatam in communi omnes unanimiter acceptavimus et approbavimus, requisitoque consensu electi ipso quidem plurimum renitente, tandem tamen humiliter consenciente Te deum laudamus more solito decantavimus sic in chorum deducendo et ipsam eleccionem etiam populo intimando. Dominacioni igitur vestre reverendissime paternitatis duximus unanimiter supplici voto ac humili cum instancia supplicandum, ut eleccionem supradictam dignetur confirmare et dicto electo nostro munus benedicionis inpartiri, quatenus auctore deo nobis velut pastor ydoneus preesse valeat et prodesse. Nosque et alii sibi conmissi sub eius regimine possimus deo salubriter militare. Ut autem omnium nostrum vota in premissis omnibus et singulis concordasse et in hanc eleccionem et petitionem convenisse noscat dominacio vestre reverendissime paternitatis antedicta eidem vestre reverendissime dominacioni hoc canonicum decretum mittimus propriis nostris nominibus et manibus annotatum et subscriptum ac dicti nostri conventus sigilli appensione et munimine roboratum, et ad maiorem evidenciam premissorum ac fidei testimonium honorabilem virum dominum Caspar, rectore ecclesie parrochialis in Vecklaprugk vestre diocese tamquam notarium et scribam, huius eleccionis ad huiusmodi negocium vocavimus, rogavimus et requisivimus diligenter, ut de omnibus et singulis per eum visis et auditis ac actitatis in hoc negocio tamquam publica et autentica persona in vim et robur publici instrumenti huic decreto manu eciam sua propria se subscriberet signoque et nomine suis solitis et consuetis consignaret et perhiberet testimonium veritati. Datum in dicto nostro monasterio Lambacensi ipsa die vigesima octava mensis marcii indicione quartadecima pontificatus sanctissimi in Christo patris et domini nostri domini Eugenii pape quarti anno eius sexto anno Domini millesimo quadrigentesimo trigesimo sexto.

Ego frater Johannes primus supra dictis omnibus et singulis consensi et consencio ac propria manu signo et subscribo.Kreuz

Ego frater Johannes secundus supradictis omnibus et singulis consensi et consencio ac propria manu signo et subscribo.Zeichen

Ego frater Hainricus primus supradictis omnibus et singulis consensi et consencio ac propria manu signo et subscribo.Zeichen

Ego frater Wolfgangus primus supradictis omnibus et singulis consensi et consencio ac propria manu signo et subscribo.Kreuz

Ego frater Ulricus primus supradictis omnibus et singulis consensi et consencio ac propria manu signo et subscribo.Kreuz

Ego frater Stephanus secundus supradictis omnibus et singulis consensi et consencio ac propria manu signo et subscribo.Zeichen

Ego frater Ambrosius supradictis omnibus et singulis consensi et consencio ac propria manu signo et subscribo.Kreuz

Ego frater Georgius supradictis omnibus et singulis consensi et consencio ac propria manu signo et subscribo.Kreuz

Ego frater Michael vicarius in Seyttensteten supradictis omnibus et singulis consensi et consencio ac propria manu signo et subscribo.Jesus

Ego frater Udalricus secundus supradictis omnibus et singulis consensi et consencio ac propria manu signo et subscribo.Zeichen

Ego frater Wolfgangus secundus supradictis omnibus et singulis consensi et consencio ac propria manu signo et subscribo.Zeichen

Ego frater Wolfgangus tertius supradictis omnibus et singulis consensi et consencio ac propria manu signo et subscribo.Zeichen

Ego frater Johannes tertius supradictis omnibus et singulis consensi et consencio ac propria manu signo et subscribo.

Ego frater Albertus supradictis omnibus et singulis consensi et consencio ac propria manu signo et subscribo.

Et ego Caspar Hornperger, presbyter Pataviensis, publicus imperiali auctoritate notarius, quia predicte ad locum eleccionis convencione iuramenti in manibus presidentis iuxta decretum concilii Basiliensis prestacioni, de eleccione tractacioni post habitos tractatus compromissioni compromissariorum iuxta dicti decreti formam, iuracioni, votorum examinacioni, hiis auditis inter se deliberacioni, unanimi eleccioni, eleccionis publicacioni solempniter in communi, eiusdem eleccionis omnium unanimiter et concorditer acceptacioni et approbacioni, ipsius electi consensus requisicioni pariter consensus preracioni, Te deum laudamus decantacioni, in chorum deduccioni, populoque facte intimacioni ac omnibus et singulis, dum sic, ut premittitur, agerentur et fierent, unacum predicto venerabili in Christo patre domno abbate in Krembsmunster et dictis fratribus conventualibus memorati monasterii Lambacensis, ac religioso et egregio viro domno Wolfgango, licenciato in decretis, et decano monasterii sancti Floriani, presens interfui, eaque omnia et singula sic fieri vidi et audivi, ideoque in vim et robur publici instrumenti huic decreto unacum propriorum nominum ac manuum dictorum fratrum annotacione et subscripcione, dictique conventus sigilli appensione propria manu me subscripsi signoque et nomine meis solitis et consuetis consignavi rogatus et requisitus in fidem et testimonium omnium et singulorum premissorum.