Leonardus Dei et apostolice sedis gracia episcopus Pataviensis venerabili et religioso in Christo dilecto Thome electo monasterii Lambacensis ordinis sancti Benedicti nostre diecesis salutem in Domino. Vacante nuper abbaciali dignitate preta[ct]i monasterii Lambacensis per obitum venerabilis et religiosi olim Johannis abbatis ibidem, prior et conventus ibidem diligenter animadvertentes, quam gravia viduatis ecclesiis et diutina vacacione consueverunt dispendia provenire in unum convenientes atque de futuro ipsorum abbate atque patre eligendo tractantes, tandem invocata spiritus sancti gracia in te oculis sue mentis dirigentes te per viam compromissi in suum patrem et abbatem concorditer et canonice elegerunt, supplicantes nobis humiliter, quatenus eleccionem huiusmodi auctoritate nostra ordinaria graciosius confirmare dignaremur. Nos vero secundum apostolum nemini cito manus volentes imponere premissa solempni crida vocatis, que fuerant evocandi in certo et peremptorio termino ad hoc statuto tam eleccionis forma quam personam tuam examinavimus diligenter, et quia eleccionem ipsam ex forma canonicam et concordem, personam vero tuam literarum sciencia, vita et moribus multipliciter commendatam ac in spiritualibus et temporalibus plurimum circumspectam conperimus, idcirco tam eleccionem huiusmodi quam personam tenore presencium approbantes eam in nomine Domini auctoritate nostro ordinaria confirmamus preficientes te dicto monasterio in abbatem et pastorem ipsius curam et regimen nec non administracionem tam in spiritualibus quam temporalibus plenarie committendo, harum sub appensione sigilli nostri testimonio literarum. Datum in Anaso vigesimasecunda die mensis apprilis anno Domini millesimoquadringentesimotrigesimo sexto.