Ich Elspet, des Hanns Stainpekch hawsfraw, purgerinn zu Passaw, enpewt dem erwirdigen geystleichen herren herrn n. abt zu Lambach mein willig gehorsam dienst. Ich lazz ewr genad wissen von des guecz wegen zu Mosleitten, ir welt mir, meinen eriben mitsambt meinem pruder dem Michel, daz daz verleichen und bestatten unser gerechtichait und ain brieff daruber geben wellet mit ewrem insigel. Darum pitt ich ewch mit fleizz, als dann mein benanter pruder auch mundleich mit ewch reden wirt. Des zu urchund gib ich den brieff besigelt mit dez erbern weisen Hanns dez Ekker furgetruchten insigel, den ich obgenantew Elspett fleizzig darumb gepetten hab, im und sein eriben an schaden. Der brieff ist geben dez suntags nach sand Gyligentag, do man zalt nach Christi gepurt vierczehennhundert jar und in dem sechsunddreyssigistem jare.