Wir Thaman von Gottes genaden abbt ze Lambach, bekennen mit dem brief, das fur uns komen ist Magens Fledrein und hat mit wolbedachtem muet und guetem willen recht und redleichen verkaufft das Semelgut, gleichhalbs ze Freyhaym in Widemspekcher pfarr gelegen, seinem sun Steffann, seiner hawsfrawn Elzpethen und iren baiden erben umb ain gelt, des sy gantz und gar gericht und gewert sein zu rechten tagen an allen schaden. Also haben wir in dem yeczgemelten Steffann, seiner hawsfrawn Elzpethen, und irn baiden erben das gemeltt gut halbs mit sein zugehorungen bestett und verlichen zu rechttem kauf und erbrecht in der beschaiden, das sy uns und unserm gotshaus alle jar jerleichen davon raichen und dienn sullen nach innhaltung unsers urbarpuchs. Es ist auch der obgemeltt Magens, sein hawsfraw und all sein erben des gemeltten seins sun Steffann und seiner hawsfrawn Elzpethen und irr baider erben ir recht gewern und furstant fur all rechtleiche, ansprach, wo in des mit recht, not und durft beschiecht, als dann soleichs kaufs, eribrechtz und lanndes ob der Enns recht ist. Darzue verczeichent sy sich auch des benanten halben gutz gantz und gar, ausgenomen, in geb dann der tod rechtleich icht. Wir melden auch, sy sullen kain wanndlung damit nicht haben in kainerlay weys an unnser hanndt und gutem willen, und sullen uns auch alles das davon leyden und dulden, das ander unsers gotshawss erbler gein uns leydent und duldent unverczigen unsers gotshawss rechten in allen sachen. Ze urkund geben wir in den brief, besigeltem mit unserm anhanngundem insigl, geben als man zalt nach Kristi geburd in dem virczechenhundertundsechsunddreissigisten jaren am freytag nagst nach unser lieben frawntag assumpcionis Marie.