Dem erwirdign geistleichen herren hern Thoman abbt zu Lambach meinem genedigen lieben herren enpewt ich Caspar Lechner purger zu Wells meinn willig dinst zevor. Ich tun ewrn gnaden ze wissen umb die stozz und misshelung, so da gewesen sein zwischen mein auf ainem tail und Clareyn, Symans des Ledrer seligen witib, Margreten, Symans des Sneyder hausfraw, und Dorothee, Wolfgang des Camerperger hausfraw auf dem andern von des guts wegen ze Stokchech, das ewrn gnaden und ewrn gotshaws dinstper ist, gelegen in Wellser pharr pey Obernlahen. Umb dieselben unser stoss habent uns erber frem lewt miteinander verricht und veraint, also des ich in des gutz hab abgetreten. Und was ich gerechtigkait daran hab, die sent ich ewrn gnaden auf mit dem brief, und pitt mit vleiss, ewr gnad wolle den benanten frawn irn erben und miteriben das benant gut mit aller seiner zugehorung geruchen ze verleichen, das wil ich umb ewr gnad allczeit gern verdyenn. Mit urkund under meinem des obgenanten Caspar Lechner aigen aufgedruckten petschat, und zu guter geczeugnuss hab ich mit vleiss gepeten den erbern und weysen Hannsen den Heresinger, das er sein insigel auf den brief gedruckcht hat, im sein eriben an schaden. Geben an sant Laurenczenabent anno etc. tricesimosexto.