Julianus miseratione divina titulo sancte Sabine sancte Romane ecclesie presbyter cardinalis, vulgariter sancti Angeli nuncupatus, in Germania apostolice sedis legatus, venerabili Thome abbati Lambacensis, ordinis sancti Benedicti, Pataviensis diocesis, salutem in Domino. Benigno sunt illa tibi concedenda favore, per que sicuti pie desiderare videris consciencie pacem et salutem anime Deo propitio consequi merearis, hinc est, quod nos tuis devotis supplicationibus inclinati tibi auctoritate legationis nostre, qua fungimur, tenore presencium indulgemus, ut aliquem ydoneum et discretum presbyterum tuum possis eligere confessorem, qui confessione tua diligenter audita te ab omnibus criminibus et peccatis, que sibi confiteberis, etiam si casus fuerint sedi apostolice specialiter reservati presertim ab omni labe symonie, si quam quavis occasione vel causa commisisse censeberis, nec non a quibuscunque excommunicationis, suspensionis aut interdicti sententiis per constitutiones provinciales et sinodales ac statuta et ordinationes monasterii et ordinis predictorum seu alias a iure generaliter promulgatis ac penis et censuris aliis, a quibus legatus de latere absolvere potest, et signanter a sententia excommunicacionis, si quam forte propter susceptionem symoniacam aut vitiosam vel et aliorum activam vel passivam ad monasterium et ordinem tuum secundum extravagantem quondam domni Urbani pape v. incurrisses, absolere valeat, ac tibi debitam absolutionem impendat et iniungat penitentiam salutarem, ita tamen, quod in dicto monasterio non obstante, si ad illud symoniace aut alias vitiose, ut premissum est, susceptus fueris, licite remanere possis et valeas. Volumus autem, quod si dictum monasterium aliquod recepisset, quod symoniacam saperet pravitatem, quod illud in causa Bohemorum convertatur, insuper prefato confessori, quem duxeris eligendum auctoritate apostolica nobis in hac parte specialiter concessa committimus, ut si quam irregularitatis maculam premissis sententiis vel penis seu aliqua premissarum sic ligatus aut alias coram excommunicatis vel in locis interdictis ignoranter et non in contemptum clavium divina celebrando officia aut alias immiscendo te eisdem contraxisti vel incurristi teque ad tempus, prout dicto tuo confessori expedire videbitur, a tuorum ordinum executione suspenso, demum suffragantibus tibi meritis ac alio non obstante canonico tecum in Domino misericorditer una vice dumtaxat dispenset, proviso tamen ut si quibus propter premissa ad satisfactionem aliquam tenearis satisfacias competenter. Ceterum discretioni tue committimus quatenus auditis diligenter per te vel alium seu alios confessoribus singulorum monachorum prefati tui monasterii ac etiam aliorum causa reformationis ad dictum tuum monasterium venientium ipsos omnes a sententiis, penis et censuris predictis, si quas incurrerunt, absolvas et cum presbyteris et aliis in sacris ordinibus constitutis super irregularitate, si quam modo et forma premissis contraxerunt, iuxta tenorem suprascriptum misericorditer dispenses cum eisdem. Datum Basilee die vicesimaseptima julii anno Domini millesimoquadringentesimotricesimosexto, pontificatus sanctissimi domni nostri domni Eugenii divina providentia pape quarti anno sexto.