Ich Margrett dez Czechenperger im Newnmarkcht salign witib enpewtt dem erwirdign und geistlichn meinem genadign liebn herrn herrn abbt Taman mein willig dinst. Genadiger herr, es hat mein wirtt saliger ain erbttaill hinder euch gehabt czu Adolltpottinger, den er mit chauff in sein gwalt bracht hat, dez sind czway funffttaill aus dems Messrer drittail, genadiger herr, de ich nicht lenger gehabn mag. Pit ich ewr gnad, ir wellett deselb mein gerechttikait Niklasn dem Sigharttn, purger im Newnmarkchtt, leichen, und daruber stat tun mit brieff und sigll, und wan ir das also tan habtt, so will ich noch all mein erbn in ewr sigll nicht redn und schultt, auch ir und ewr gotzhaws dez von uns hinfur unnengoltn sein. Mit urkund dez petbrieffs under des edln weisn Gorigen des Anggrer Czuppffing und Wolffgang dez Prugknar purger im Newnmarkcht baider auffgedrukchten insigll, und de ich vleizz darumb gepettn hab, in und irn baidn erbn an schaden, der gebn ist nach Kristi gepurdt virczehnhundert jar und in dem newnunddreyssigistn jare am suntag Ocali in der vasten.