Ich Hanns Muerr ze Winkchlorn, ich Kathrey sein hawsfraw veriechen fur uns und all unser eriben und tun kund offennleichen mit dem brief allermenikleichen, den er furkumbt ze horn oder ze lesen, als uns der erwirdig geistleich unser genadiger lieber herr abbt Thoman ze Lambach, sein conventt die zwen hof, den obern und nidern hof ze Winkchlorn in Lambekcher pharr gelegen, zu eribrecht verlichen habent, darumb wir brief und sigel von in ausganngen darumb haben, in denselben unsern briefen sew ainen auszug und ausnemen getan habent, also wie sew ir notdurft, nutz und frumen betrachtten, besuchen sulln und mugen mit erdreich zu ziegeln ze nemen aus dem wismad, so zu den gemeltten hofen gehornt, als das vormallen von altter herkomen und albeg beschechen ist. Globen und versprechen wir dem gemeltten unserm genadigen lieben herrn abbt Thoman, seinem conveentt und allen irn nachkomen mit unsern trewn in aydesweys wissentleichen mit krafft des briefs, das wir, ich obgemeltter Hanns Muerr, ich Kathrey sein hawsfraw, fur uns, all unser eriben, miteriben und nachkomen, oder wer die gemeltten hof nach uns besicztt und innhat, er sey frewndt oder fromder noch nyemants von unsern wegen in solhem vorberurten auszug, kain phrengung, irrung noch engung gein in oder den irn nicht haben noch tun sulln noch welln mit wordten, werichen, klain oder groz, mit recht noch an recht, geistleich noch weltleich noch in kainen andern sachen und weys trewleich und ungeverleich, und sullen und mugen auch allen iren nutz, frumen und notdurft, so vorgemeltt ist, betrachtten, sunder ir anbelt in irr stat mit erdreich zu ziegeln ze nemen aus dem wismad, so zu den gemeltten hofen gehornt, was sew des bedurffen an unser aller widersprechen und bey unsrer vorberurten glubnnuzz angever. Wir sullen und wellen in auch den dienst unverczogenleichen, so von den benanten hofen gepurdtt ze geben, all jar jarleichen raichen und geben zu yeder zeit, auch alles des gehorsam sein, das unser brief uns uber die gemeltten hof gegeben innhaltung und ausweysung an allen auszug und widerred getrewleich und ungeverleich. Ze urkund ainer woren stetikait geben wir in des also den offenn brief, besigeltem mit der edeln, weisen Erhart des Paiszen und Wolfganng des Mathawser baider aigen anhanngunden insigeln, die wir mit vleiss darumb gebeten haben, in baiden und alln irn eriben an schaden. Zewgen, das wir umb die insigel gebeten haben Hanns der alt Zyphinger, Paul auf der Od, Symon am Nidernstadel, Niklas Affnanger, Niklas Schreiner, Thoman Saltzreyter, Michel Hannsen sun von Winnkchel, und frumer lewt ainkleich und genug under der benanten insigel und zewgen wir uns, ich obgemeltter Hanns Muerr, ich Kathrey sein hawsfraw, fur uns, all unser eriben, miteriben und nachkomen verpinden mit unsern trewn in aydes weys alles das war und stet ze halden, daz der brief innhaltt und ausweist, der gegeben ist als man zalt nach Kristi geburde in dem vierczechenhundert und vierczigisten jaren an eritag vor sannd Kunigundentag der heiligen junkchfrawn.