Wir Thaman von Gotes genaden abbt ze Lambach bekennen mit dem brief, das fur uns komen ist Hanns Griessel, burger ze Yschel, und hat uns furbracht briefleichew urkund, ausganngen von unserm vorsedel abbt Jacoben selig gedechtnuzz, damit underweist, wie zwen gled sein rechts vaterleichs erib sein, und ainen gledt hab er von seinem vater Meinharten dem Griessel seligen vor zeiten gekaufft, das uns wol wissentleichen ist, der ain benant gled ist gelegen zwischen Hanssen des Sokel und Jacoben des Scheyczleichs gleden, dann die andern benantten zwen gled sind gelegen zwischen Micheln des Rumpplindasen und Jorigen des Hardegker gleden hindter unserm saltzstadel in unserm purkchfrid am Stadel, da gentt yetz in dew benanten drey gled sechsthalbew tur. Bat uns der obgemeltt Hanns Griessl, das wir im, seiner hawsfrawn, und allen sein eriben die benanten drey gled mit irn zuegehorungen geruchten zu bestetten und verleichen. Also haben wir im dem yetz gemeltten Hannsen, seiner hawsfrawn und allen sein erben nach soleich vleissiger pet und underweisung die benanten drey gled mit irn zugehorungen bestett und verlichen, was wir in rechtleichen daran bestetten und verleichen sullen oder mugen in der beschaiden, das man uns und unserm gotshaws all jar jarleichen davon raichen und dienn sol zu sannd Michelstag, als man uns von andern gleden in unserm purkchfrid am Stadel raicht und dient. Wir offen auch, daz sy kainerlay wanndlung damit nicht haben sullen in kainerlay weis an unser hanndt und gutem willen, und sullen uns auch alles das davon leyden und dulden, das annder unsers gotshaws lewt gesessen in unserm purkchfrid am Stadel von soleichen gleden gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngunndem insigil. Geben als man zalt nach Kristi geburd in dem vierczechenhundertundvierzigisten jaren an mantag vor sannd Kunigundentag vor Letare in der vasten.