Wir Thaman von Gotes genaden abbt ze Lambach bekennen mit dem brief, das fur uns komen ist Michel, Hannsen sun ze Winkchel, und hat mit wolbedachtem mut und gutem willn recht und redleichen gemacht und gegeben seiner lieben eleichen hawsfrawn Barbara, Hannsen des Mewren swester ze Haydach vierundzwainczigk phunt phening zu rechtter morigengab und die ubertewrung zu rechttem heyratgut, yedes nach dem lanndesrecht ob der Enns auf ainem virtail akcher, gelegen ze Winnkchel in Kirichaymer pharr und eribrecht ist von uns und unserm gotshaws, des wir underweist worden sein mit briefleicher urkund ausganngen von unserm vorsedel abbtt Erasm seliger gedechtnuzz. Also haben wir ir der benanten Barbara das benant viertail akcher mit seiner zuegehorrung das vorgemeltt ir gemachtt darauf bestett und verlichen, was wir ir rechtleichen daran bestetten und verleichen sulln oder mugen, doch das man uns und unserm gotshaws all jar jarleichen davon raichen und dienn sol nach innhaltung des briefs, so uber das benant virtail akcher ist lawt und sag. Es ist auch der obgemellt Michel und all sein eriben des benanten virtail akcher mit seiner zugehorung der benanten seiner hawsfrawn irs gemelten gemachtz darauff rechtt gwern und furstanndt fur all rechtleichew ansprach, wo und ir der not und durft beschiecht mit dem rechten, als dann soleichs gemachts, marigengab, heyratsgutz und lanndes ob der Enns recht ist. Wir offen auch, das sy kainerlay wanndlung damit nicht habn sol in kainerlay weis an unser hanndt und gutem willn, und sulln uns auch alles das davon leyden und dulden, das annder unser und unsers gotshawss eribler gein uns leydent und duldent unverczigen unsers gotshawss rechten in alln sachen. Ze urkund geben wir in des also den offen brief besigeltem mit unserm anhanngundem insigel. Geben als man zalt nach Kristi geburd in dem vierczechenhundertundvierczigisten jaren an mantag an sannd Ambrosii tag des heiligen bischolve.