Wir Thoman von Gotes genaden abbt ze Lambach bekennen mit dem brief, das fur uns komen ist Hainreich Wintterer und hat mit wolbedachtem mut und gutem willen recht und redleichen verkaufft ain wis und ain ordt zenagst dabey hinaws undtz an den weg mit irn zugehorungen, also die ausgezaigtt mit marich und zawn umbvanngen sind, gelegen in unsrer aw genant auf der Wenng in Welser pharr her oberthalben Waidhawsen bey der Trawn her derhalben auf dem lanndt, da Wels auf leyt und in unserm ambt ze Stross und eribrecht sind von uns und unserm gotshaws, Hannsen dem Tennkken ze Waidhawsen, seiner hawsfrawn und allen sein eriben umb ain sum gelts, der er gantz und gar ausgerichtt und beczalt worden ist zu rechtten tagen an allen schaden. Also haben wir im, dem yetz gemeltten Hannsen, seines haws[frawn] und allen sein eriben die benanten wis und ordt mit allen zugehorungen zu rechttem kauf und eribrecht bestett und verlichen, was wir in rechtleichen daran bestetten und verleichen sulln oder mugen, doch das man uns und unserm gotshaws all jar jarleichen davon raichen und dienn sol zu unser lieben frawntag der dinstczeit drey schilling und funffundzwainczigk Wienner phening. Es ist auch der obgemeltt Hainreich Winntterer und all sein eriben der benanten wisen und ordt mit irn zugehorungen des benanten Hannsen, seiner hawsfrawn und aller seiner eriben rechtt gwern und furstandt fur all rechttleichew ansprach, wo und wann in des not und durft beschiecht mit dem rechten, als dann soleichs kauffs, eribrechts und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weys an unser hanndt und gutem willen, und sullen uns auch alles das davon leiden und dulden, das annder unsers gotshawss eribler gein uns leydent und duldent unverczigen unsers gotshaws rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundvierczigisten jaren an eritag nach Ambrosii episcopi.