Johannes Dei gracia episcopus Argensis, sacrosancte generalis synodi Basiliensis in spiritu sancto legitime congregate universalem ecclesiam representantis, necnon sanctissimi in Christo patris et domini nostri domini Felicis quinti ad summum apostolatus apicem electi legatus dilcito nobis in Christo Thome abbati monasterii Lambacensis ordinis sancti Benedicti, Pataviensis diocesis, salutem in Domino. Devocionis tue exigentibus meritis illa tibi libenter concedimus, que tue consciencie pacem et salutem respiciunt annue, hinc est quod nos tuis devotis supplicacionibus, quantum ccem Deo possumus favorabiliter annuentes, auctoritate legacionis nostre, qua fungimur in hac parte tibi aliquem ydoneum et discretum presbyterum in tuum possis eligere confessorem, qui quociens tibi fuerit oportunum, confessione tua diligenter audita, pro commissis tibi debitam absolucionem impendat et penitenciam iniungat salutarem, nisi talia forent, propter que sedes apostolica merito fuerit consulenda, tenore presencium indulgemus, presentibus toto vite tue tempore duraturis. Datum Wienne Pataviensis diocesis, die sabbati xvi mensis aprilis anno a nativitate Domini millesimo quadringentesimo quadragesimo nostro sub sigillo maiori.