Ich Michel Marichholcz purger zw Wels bekenn mit dem offenn brief, das ich mit eleicher heyret chert hab czw dem erbern Petern dem Motschier, des alten Motschier sun zw Ried, dem ich mein tachter junchfrawn Kathrein zw einer eleichen hawsfrawn versprochen hab. Da ist zwischen uns durich frum und erber lewt beredt und verlassen also, das ich dem benanten meinem aydem zu meiner tochter vermachen und geben sol auf dem stukch wismad, das ich von meinem vettern Casparen dem Spiczbekchel kaufleich chauft hab mit aller seiner rechtleichen zuegehorung, gelegen in meim wismad bey dem Grunpach, sibenczigk pfunt pfening, und darczue schol ich beraitter pfening dreyssigk pfunt zw Wels niderlegen, die sullen dann also noch unser baidtail freundt rat angelegt werden. Dieselben sibenczigk pfunt pfening und die dreyssigk pfunt vorgemelt sullen meinem aydem vermacht werden zu rechtem heyretgut nach dem lanndesrechten. Auch ist beredt zwischen unss, ob mein tachter vor dem benanten meinem aydem mit tode abgieng, da Got lanng vor sey, und leiberiben miteinander hatten, so schol alle varunde hab bey dem benanten meinen aydem beleiben. Und ob ich obgenanter Michel Marichholcz daraus trett und nicht stet hielt, als oben berurt ist, so pin ich dem benanten meinen aydem vervallen hundert pfunt pfening an all ausczug und widerred. Und gib dem benanten meinem aydem des die beredzedel under meinem aufgedrukchten petschaft, und darczue zu geczewgnus der bereddung hab ich mit vleis gepetten die erbern und weysen Hannsen den Checzinger und des gesworn racz zw Wels und Jorigen des Scherer purger doselbs, das sew irew petschaft auf den brief gedrukcht habent, in und irn eriben an schaden. Geben an mantag nach sannd Gorigentag anno Domini etc. xl jar etc.