Dem erwirdigen und geistleichenn herrn herrn Thoman abbt zw Lambach meinem genadigen lieben herrn embewt ich Andre Wintter burger zw [Wels] mein willig undertanig dienst. Ich hab ganczlic[h] und ledigklich uberge[ben Ma]rigreten, meiner lieben hawsfrawn all mein erib[scha]ft und gerechtikait, [so ich hab] an dem hof, genant der Pernawhof, gelegen niderhalb Wels zenagst dem [...] in Welser pfarr, den wir miteinander gekawft haben noch inhaltung ains bestatbrief, so wir daruber haben, bitt ich ewr genad mit allem vleiss, ir wellet dyeselben mein gerechtikait, so ich an dem benanten hof hab, mit seiner zwegeherung der benanten meiner hawsfrawn bestatten, also das sy und ir eriben nun furbaser allen irn frume damit schaffen mugen und sullen wie und sew verlust, das ist mein guetlich will und wort, und will auch das gern umb ewr gnad verdienn. Und send ewrn genaden darauf den brief, besigelt mit der erbern und weisenn Pawlsen des Kramer ainer des geswarn racz zw Wels, und Micheln des Gassner burger doselbs, baider aufgetrukchten insigl, die ich mit vleiss darumb gepeten hab, in und irn eriben an schaden. Geben an eritag vor der heiling drey kunigtag anno Domini xl etc. jare.