Wir Thoman von Gotes genaden abbtt ze Lambach bekennen mit dem brief, das fur uns komen ist Niklas Rahensdorffer anstat sein, seiner hawsfrawn Margrethen, und hat mit wolbedachtem mut und gutem willen recht und redleichen verkaufft die drew pewnten mit aller zugehorung, so von altter und durch recht darzu gehort, darinn nichtz ausgenomen noch hindan gesatzt angever, gelegen im Hindttwinkchel in Lachkircher pharr und rechtlechen sind von uns und unserm gotshaws, Micheln ze Elling, seiner hawsfrawn Elsbethen und irn baiden eriben umb ain sum geltz, der sew gantz und gar ausgerichtt und beczalt worden sind zu rechtten tagen an allen schaden. Also haben wir im, dem yetz gemeltten Micheln, seiner hawsfrawn Elsbethen und irn baiden eriben die gemeltten drey pewnten mit irn zugehorungen zu rechttem kauf bestett und verlichen, was wir in rechtleichen daran bestetten und verleichen sulln oder mugen. Es ist auch der obgemeltt Niklas anstat sein, seiner hawsfrawn Margrethen und irer baider eriben der gemeltten dreyer pewnten mit irn zugehorungen des gemeltten Micheln, seiner hawsfrawn Elsbethen und irer baider eriben rechtt gwern und furstannd fur all rechtleichew ansprach, wo in des not und durft beschiecht mit dem rechten, als dann soleichs kaufs, rechttlechens und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weis an unser hanndt und gutem willen, und sullen uns auch alles das davon leyden und das annder unser und unsers gotshaws soleich unser lechenlewt gein uns leydent und duldent unverczigen unsers gotshaws rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundvierzigisten jaren an phincztag vor sannd Vincenczentag des heiligen martrer.