Ich Hanns Katspekch, ich Thaman Pinter, ich Michel Lobensyn, ich Kathrey Hannsen des Nidermayr im Katspach hawsfraw, geswistred, veriechen fur uns und all unser eriben und tun kund offennleichen mit dem brief aller menikleichen, den er furkumbt ze horn oder ze lesen, das wir veraintleichen mit wolbedachtem mut und gutem willen recht und redleichen abgetreten und ubergegeben haben unsern halben Nidernhof, genant der Schikchhof ze Katspach mit aller zugehorung, so von altter und durich recht darzu gehort, darinn nichts ausgenomen noch hindan gesatzt angever, gelegen in Welser pharr, unserm genadigen lieben herrn abbt Thomann ze Lambach, seinem gotshaws und nachkomen also von solicher geltschuld wegen, die wir des yetz benanten unsers genadigen herrn vorvodern seligen nachmals im und seinem gotshaws schuldig gewesen sein, dafur wir in des benanten halben hofs mit aller zugehorung, sunder aller unserr eribschaft und gerechtikait, daran also wir in unser vorvodern inngehabt, genossen und herbracht haben angever, ingeantwurt haben aus unser nutz und gwer in die irn nutz und gwer mit allen eren, rechten, nutzen und gesuchen. Wir obgemelttew geswistred verzeichen uns auch fur uns und all unser eriben des benanten halben hofs mit aller zugehorung aller unser eribschaft und gerechtikait daran gantz und gar wissentleichen mit kraft des briefs, das wir noch all unser eriben und miteriben noch nyemants von unserntwegen furbas kain suchung tun sulln noch ansprach haben wellen umb kainerlay unser eribschaft und gerechtikait an dem benanten halben hof und aller seiner zugehorung mit recht noch an recht, geistleich noch weltleich mit wordten noch mit werichen noch in kainerlay andern sachen noch weys angever. Wir sulln und welln auch wir obgemelttew vier geswistred, all unser eriben und miteriben des gemeltten halben hofs aller unserr eribschaft und gerechtikait daran mit aller zugehorung des benanten unsers genadigen lieben herrn abbt Thoman, seins gotshawss und nachkomen rechtt gwern und furstanndt fur all krieg, invall oder ansprach sein, wo, wann in des not und durft beschiecht mit dem rechten, als dann soleichs abtretens, ubergebens, verzeichens und lanndes ob der Enns recht ist. Gieng in aber in soleichem unserm abtreten, ubergeben, verzeichen und gwerschaft icht ab, des sew schaden namen, wie derselb schad genant oder gehaissen wurd, den sullen und wellen wir in abtragen, ablegen und widerkern, und sulln und mugen auch haubtpguts und schadens haben und bekomen zu uns, unsern erben und trewn und darzu auf aller unserr hab und gut, wo wir das inndert haben, gwinngen oder hinder uns lassen inner oder ausser lanndtz, auf wasser oder auf dem lanndt, darinn nichtz ausgenomen noch hindangesatzt angever. Mit urkund des briefs, den wir umb soleich vorbekannttew sachen also geben durich worhait und gwisser stetikait willn, besigelt mit der edeln weisen Erhart des Payssen diezeit richtter ze Lambach, Jacoben des Dachsperger und Wolfganng des Mathawser, aller dreyer anhanngunden insigeln, die wir obgemelttew, geswistred mit vleyzz darumb gebeten haben, in und allen iren eriben an schaden. Des sind zewgen daz wir umb die insigel gebeten haben die erbern Ulreich Spitzwekkel burger ze Wels, Mertt Alltag zu Gaschpaltshofen, Michel ambtman im Katzpach, Kunrat Mayr von Wymppassing, Thoman von Newhaym und annder frumer lewt ainkleich und genug under der benanten insigl und zewgen wir uns obgemelttew geswistred Hanns, Thoman, Michel, Kathrey fur uns, all unser eriben und miterben verpinden mit unsern trewn in aydesweys alles das war und stet ze halden und ze volfurn, das an dem brief geschriben stet. Geben als man zalt nach Kristi geburde in dem vierczechenhundert und vierczigisten jaren an freytag vor unser lieben frawntag der liechtmezz.