Wir Thaman von Gottes genaden abbt zu Lambach bekennen mit dem brief, das fur uns komen sind Paul von Aychaim anstat seiner kinder Kathrein, Elsbethen, Angnesen, die er hat bey seiner vordern hausfrawn Anna seligen Ortolfs des Pern von Obernswaig auch seligen tachtter, und Ulreich Per, des yetz berurten Ortolfs sun, und auch Kathrey, Hannsen ze Praytenperig tachtter, und haben also mit wolbedachtem mut und gutem willn recht und redleichen verkaufft drew achttail mit aller zugehorung an dem lechen ze Obernswaig, gelegen in Newnkircher pharr, das eribrecht ist von uns und unserm gotshaus, das wir underweist worden sein mit briefleicher urkund, ausganngen von unserm vorsedel abbt Ulreichen seliger gedachtnuss und von unserm convenntt, und habent die ze kauffen gegeben irm gesweyn, bruder und vettern Lienharten dem Pern, seiner hausfrawn Anna und irn baiden eriben umb ain sum gelts, der sew gantz und gar ausgerichtt und beczalt worden sind zu rechtten tagen an schaden, dann an achttail an dem benanten lechen ist des vorberurten Lienharten rechtz vaterleichs und muterleichs erib. Also haben wir im, dem yetz benanten Lienharten, seiner hausfrawn Anna und irn baiden eriben das gemeltt lechen gleich halbs mit aller seiner zugehorung zu rechttem kauf, erib und eribrecht bestatt und verlichen, was wir in rechtleichen daran bestatten und verleichen sulln oder mugen, doch daz man uns und unserm gotshaus all jar jarleichen davon von halben benanten lechen raichen und dienn sol zu unser lieben frawntag der dienstzeit achczigkch Wienner phenning, zu sand Jorigen tag funf Wienner pfenning ze vogtstewr. Es sind auch die obgemeltten Paul und seinew kinder Kathrey, Elsbeth, Angnes und Ulreich auch des Hannnen ze Praytenperg tachter Kathrey und irer aller eriben der berurten dreyer achttail an dem gantzen lechen mit aller zugehorung des benanten Lienharten, seiner hausfrawn Anna und irer baider erbn rechtt gwern und furstanndt fur all rechtleichew ansprach, wo und wann in des not und durfft beschiecht mit dem rechten, als dann soleichs kauffs eribrechtz und lanndes ob der Enns recht ist. Wir offen auch, das sy kainerlay wanndlung damit nicht haben sullen in kainerlay weys an unser hanndt und gutem willen, und sullen uns auch alles daz davon leyden und dulden an allew widerred, das annder unsers gotshawss eribler gein uns leydent und duldent unverczigen unsers gotshauss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundvierundvierczigisten jaren an phincztag nach Letare.