Wir Albrecht, von Gotes gnaden erczherczog ze Osterreich, ze Steyr, ze Kernnden und ze Crain, grave zu Tirol etc. bekennen, als unser lieber getrewer Wolfganng von Wallsee, unser hofmaister und haubtman ob der Enns, durch seiner seel hail zwo swaigen enhalb Klaus an der Hohenwartt gelegen zu dem gotshaus Lambach gestifft und gegeben hat nach ynnhalt des brief darumb ausganngen, bat uns der ersam geistlich unser lieber andechtiger n. der abbt daselbs anstat sein und des gannczen convents ze Lambach diemuetiklich, daz wir darczu unnsern willen ze geben, und das als lanndsfurst zu bestetten genediklich geruechten. Also haben wir angesehen solh sein fleissig bete und unnsern guten willen darczu gegeben und bestatt, geben und bestatten wissenlich mit dem brief, was wir als lanndsfurst daran bestatten sullen oder mugen die benanten zwo swaigen ynnhaben, nuczen und niessen und zu des obgeruerten gotzhauss notdurfften geprauchen in massen die bemelt verschreibung darumb ausweist, getreulich und ungeverlich. Darauf gebieten wir den edlen und unnsern lieben getrewen allen unnsern haubtlewten, graven, herren, rittern und knechten, phlegern, burggraven, burgermaistern, richtern, reten, gemaynden, ambtlewten und allen andern unnsern undertanen und getrewen, den diser unser brief furbracht wirdet, und wellen ernstlich, daz sy solh unser bestatt und gnad stet halten und den benanten abbt und all sein nachkomen dawider nicht dringen noch des yemant andern ze tun gestatten in dhain weis, sunnder sy von unnsern wegen dabey vestiklich hannt habet, daz ist unser ernstliche maynung. Mit urkundt des briefs datum zu Wels an freytag vor sannt Marteinstag nach Kristi geburd tausent vierhundert und in dem ainsundsechczigisstenn jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. V, ab anno 1461-1482, S. 31f, Nr. 2426