Wir Thoman von Gottes genaden abbt ze Lambach bekennen mit dem brief, das fur uns komen ist Kuntz Hayndorffer unnserer burger ainer hie ze Lambach und hat mit wolbedachtem mut und gutem willen recht und redleichen verkaufft das gut ze Penewanng gelegen bei der kirchen und pharr daselbs, und hat das ze kauffen gegeben Lienharten dem Sneider am Aigenn, seiner hausfrawn Breyden und iren baiden erben umb ain sum gelcz, der er gantz und gar ausgericht und beczalt worden ist zu rechtten tagen an allen schaden. Also haben wir im dem yetz benanten Lienharten, seiner hausfrawn Breyden und iren baiden erben das obgenant gut mit aller seiner zugehorung zu rechttem kauf und erbrecht bestett und verlichen, was wir in rechtleichen daran bestetten und verleichen sulln oder mugen, doch das man uns und unnserm gotshaus all jar jarleichen davon raichen und dienn sol zu unnser lieben frawntag der dienstzeit achczigk pfenning und drew huner, zu sannd Michelstag funff Wienner phennig ze weinfur, zu dem prehentag sechczigk Wienner pfenig ze pawsteur, zu sannd Jorigentag funff Wienner phenning ze vogtsteur. Es ist auch der obgemeltt Kuntz und all sein erben des obenanten guts mit aller seiner zugehorung des berurten Lienharten, seiner hausfrawn und irer baider eriben rechtt gwern und furstandt fur all rechtleiche ansprach, wo und wann in des not und durft beschiecht mit dem rechten, als dann solh kauffs, erbrechtz und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unnser handt und gutem willen, und sullen auch das berurt gut stiftleich und pewleichen legen und halten, auch damit trew, gehorsam und gwerttig ze sein und alles das gein uns leyden und dulden, das annder unnsers gotshauss erbler gein uns leydent und duldent unverczigen unnsers gotshauss rechten in allen sachen. Ze urkund geben wir in des also den offenn brief, besigeltem mit unnserm anhanngundem insigel. Geben als man zalt nach Kristi geburde in dem vierczechenhundertundzwaynundsechczigisten garen an mantag vor Katherine.