Dem erwierding geistlichnn herrnn Johannsen abbt zw Lambach unnserm genadigenn herrnn enpewt ich Jorig pei dem Pach auss Swannser phar, Elspett seynn hausfraw unnser willig unnd gehorsam dienst bevor. Wir fuegenn ewrn genadenn zw wyssenn, das wir recht unnd redlich verkauft und kauflich zw kauffen gebenn habenn unnsern lieben vetter Veittn zu Perig aus Tesselpnunner phar, Anna seynner hausfraw unnd allenn irn paidenn eribm, dew sy habenn oder noch chunfttigklich gewingen, das viertaill aus dem Lamprechttenn guet zw Perig inn Tesselprunner phar mit aller seynner zuegehorrung, unnd gehortt mit der herschafft ewrn genaden unnd ewrn genadenn gotzhauss zwe umb ain summa gelts, der wir vonn inn zw rechtten tagen an allen schadenn recht unnd redlich schon bezalt sein worden. Unnd senndenn ewrnn genadenn darumben dew offenn petzettel, das ewr genad dem obgenantten unnserm liebnn vettern Veitten, seynner hausfraun Anna unnd allenn iren paiden eribenn ein gewondlichen landtleuffing darumben kaufbrieff gebt, unnd mit ewrm insigel vuertigt unnd bestatt, unnd wenn ewr genad dann das also gethann hat, so gelobenn wir ewrn genaden unnd ewrn genadenn gotzhauss fur unnser unnd all unnser eriben ewrn genaden hinfur inn ewr brieff unnd sigel, auch vertigung nichtz zw reden pey unnsern treun aydes weys angever. Wir verzeichenn unns auch des obgenanntten viertaill inn dem obgenannttn guet fur unns und all unnser eriben inn ewige firzicht, das wir darzue noch darnach chain zuespruch noch vodrungen nymermer sollen noch wellen haben, weder mit recht noch anrecht, geistlich noch weltlich noch anders yemandt vonn unnsern wegen alles treulich unngeverlich. Unnd sennden ewren genaden darumben den offenn petzettel bewartt durch unnser vleissigenn gepet willenn mit der erbern weysen Michel Haslinger zw Obernholczhaym, ambtman der obgenanten herschafft unnd Hanns Haslinger aynner des ratz unnd burger zw Swanns baider aufgedruckchtten petschadt, doch inn unnd iren paiden eriben auch der herschafft Lambach ann ir vodrungen unvergriffenlich unnd an schadenn, untter dew petschadt wir unns mit unnsern treun aydes weys verpintten, alles war unnd stat zw haltten inhalt des briefs. Zewgen unnd gepet umb dew petschadt auch umb das insigel an den kawfbrieff sind die erbern Hanns Vischer auff der Purkchlewttenn, Wolfganng zw Anczentall, Leonhart daselbs unnd annder erber lewtt meniger. Geben nach Cristi geburdt tausent vierhundert unnd dar nach im vierunndachzigistenn jar an phincztag vor invocavit in der heyling vastenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 76f, Nr. 3072