Dem erbirding geistlichen herrn herrn Hanns abt zw Lambach meinem genadigen herrn mein willig dinst bevor. Ich fueg eren genaden ze wissen, das ich Anna, des Kirichmair hausfraw zu Ofthering, nach dem und wir payde mit unserem gueten willen und notdurft wegen verchauft haben und zu kauffen geben haben unseren acker, so wir gehabt haben czu Truendorf in Hersinger pfarr gelegem, dem erberen Wolfgang Fering pey der Trawn. Nun pitt ich eur gnad mit vleiss zu verferting und versaring den iecz gemelten Wolfgang Fering mit brieff und sigel, das wil ich umb eur gnad verdienen. Und so das beschiecht, so gelob ich obbemelte Anna Kirichmayrin in ewr brieff noch insigel niymmer mer ze reden noch dar wider ze thuen pey meiner trew und warhayt, und des zu ainer waren urkunt und zeugnuss schick ich ewern genaden den brieff verpetschafft mit der erbern Lienharten des Schifer ambtman, und Steffan Walckel payd zu Ofthering aufgedruckten petschaften, die ich dar uber vleissig gepeten hab, in und iren petschaften an schaden, der geben ist an dem tag unser lieben frawn schiedung anno domini M^o cccc und darnach im lxxxiiii jar

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 109, Nr. 3095