Dem erwurdigen in Got und geistlichenn herrn herrn Johannsen abbte zw Lambach unserm genadigenn herren enbiettn wir n. richter und ratt der schtat zw Wellss unserr willig dienst bevor, und fuegen ewrn gnaden zw wissnn, das wir kauflich verkauft haben Wolfgangen Knolln, unserm mitburger und seinen eriben dy halb wisnn mit sambt der weglenge zw Mostall in Gunskircher pharr mit ainem ortt an den Pach zw nagst des Pirchinger wisnn und mit dem andern ortt an den weg gelegen, dy uns dan von Hansen dem Zotn saligen inhallt brieflicher urkund geaigent und bevolhn wordenn ist und von ew und ewrm genaden gotshaws lehen und dienstpar berurt. Also pittenn wir ewr gnad alls unseren genadigen herren, wellet dem benanten Knolln und sein eribm dy berurt wisnn inhallt des kaufbriefs, so ewrn genaden furkumbt nach ewr genaden gotzhaus gewonhait bestattn und genadiklich leihen und so ewr gnad das gethan, geloben wir ewrn genaden in solh bestat und lehen mit nichte zu redn, sunder umb ewr genad alls unsern genadigen herren willig gern verdien, und senden ewrn genaden hyemit zw urkund den offn pettbrief mit der erbrn und weisn Joring des Schefman, dy zeit unser statrichter, und Cunraten des Achlewter unsers mitgeswornn bayder zwrukch aufgedrukchten insiglln [5mm Lücke]ch selb und nach unserm der andern des ersamen rats wegen solh pett ve[17mm Lücke] habenn. Geben an montag vor sand Maria Mada len tag im vi[37mm Lücke]ier und achzigistn jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 106f, Nr. 3093