Dem erwierdigenn geistlichenn herrenn herrenn Johannsenn, abbt zw Lambach unnserm genadigenn herrenn enpewt ich Kathrei des Mathesenn Sneider etwen gesessenn zu Pfaffenperig saling tochtter und ich Jorig Lindlawer, ir eelicher hauswierdt, unnser willig unnd gehorsam dienst bevor. Wier fuegen ewern genaden zw wissen, das ich obgenanttew Kathrei mit willen und gunst meines lieben hauswierdt obgenandt, verkauft und kauflich zw kauffen geben hab meinem lieben Steffendlen, Wolfganngen Peutler zw Pfaffenperig auss Rustorffer phar, Agnesen seyner hausfraun unnd allen iren payden eriben meinen geleichenn eribtaill, so ich ungeverlich gehabt hab ann dem viertaill aus der halben hueb zw Pfaffenperig genanndt die Gewmanhueb, do auff er den dew zeit hewslich gesessen ist unnd ist ewern genaden unnd ewern genaden gotzhauss dienstper, umb ain summa gelt, der wir von in zw rechtten tagen an alln schaden recht unnd redlich schon bezalt sein worden, unnd sennden ewern genaden darumben dew offenn petzettel bewardt das ewr genadt dem obgenantten Wolfganng Peittler, seynner hausfraun und allen iren paiden eriben ein gewondlichen kaufbrieff darumben gebt und mit ewern insigel ververtigt und bestat unnd wenn ewr genad denn das alzo gethan hat, so geloben wir ewern genaden unnd ewern genaden gotzhauss in ewr brieff unnd sigel auch vertigung nichtz zw reden pey unnsern trewn aydes weys angever. Wir verzochenn unns auch des obgenanntten unnsers geleichen eribtail an dem obgenantten viertaill fur unns unnd all unnser eriben inn ewigew fierzicht, das wir darzue noch darnach kain zuespruch noch vodrung nymer mer sollen noch wellen haben weder mit recht noch an recht geistlich noch weltlich noch annders yemandt von unnsern wegen, ausgenomen unns gab denn der tod icht rechtlich, des verzeich wir unns nicht alles treulich ungeverlich, unnd geben ewern genaden darumben dew offenn petzettel, bewardt durch unnser vleissigenn gepet willen mit der erbern weyssen Micheln Haslinger zw Obernholczhaym, ambtman der obgenantten herschafft aygen aufgedrucktten petschadt unnd Hannsen Haslinger, burger zw Swanns auch aufgedrukchtten petschadt, doch inn unnd iren baiden eriben, auch der herschafft an irn dienstten unnd vodrungen unvergriffenlich unnd an schaden. Zeugen unnd gepett umb das petschadt, auch umb das insigel an dem kaufbrieff sind die erbern weysen Michel Zottel aynner des ratz unnd burger zw Swanns, Hanns Puessinger, burger daselbs, Paull Smid zw Hintterlewtten auss Gaspalczhoffner phar unnd annder erber lewtt meniger. Geben nach Cristi unnsers herrn gepuerdt tausent vierhundert unnd darnach in vier und achzigisten jar an sambstag vor Udalrici.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 105f, Nr. 3092