Dem erbirdign in Gott und geistlichen hern hern Johanns abptt zu Lambach meinem genedigen hern enpewt ich Ursula des Joring Reissinger zw Korling Harkirher phar elichew hausfraw mein willig untertenig und gehorsam dinste und fueg ewr genaden ze bissen, das ich mein geleichen eribtail, so ich gehabt hab in dem gut zw Obernfurt, da der Egkher auft siczt, in Chelhaimerpharr und im Erlinger lannt gericht gelegen, verkauft hab zw ainem ebigen stattem kauff und ebiger verzicht dem Hanssen, des Linharten sunn zw Aschach und Dorothea seiner hausfrawn und allen irn eriben umb ain summa gelts, der ich von in ausgericht und pezalt pin an allen meinen schaden. Darauff pitt ich ewr genad mit sundernn vleis, ir wellet im und allen irn eriben ainen lantleiffing kaufbrieff darumb verferting nach aller notturfft under ewern aigen anhangundem insigln. So ir das also getan habt, alsdann gelob ich obenante Ursula fur mich und all mein eriben pey meinen trewn an aides stat in ewr genad brieff unnd sigel noch in denn penentten kauff yeczund noch hinfur darnach noch darein nichtesmer zue sprechen noch zw reden haben sullen noch gebingen mugen mit recht noch an recht in gar kainerlay weisse trewlich und an all gevar. Des zw ainer waren urkund, so gib ich obenantte Ursula ewern genaden den offen petbrieff versigelten mit des erbern und weissen Steffan Taufkirher, die zeit purger in Newnmarkht und probst und ambtman der korherischen guetter zw Passaw aigen aufgedrukhten insigel, den ich mit vleis darumb gepetten hab, doch iem und allen sein eriben und insigln an schaden. Der gepett umb ewr genad insigel und des kauffs sind zeugen die erbern Sigmund Reytaler, die zeit purger zw Passaw, Jorig Kesselpamb und Hanns Yczlinger, die zeit paid purger im Newmarkht und mer frummer lewt genug. Geben an erichtag vor sannd Veicztag alls man zalt nach Christi Jesew gepurd tausent vier hundert jar und darnach im vierundachczigisten jarnn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 98f, Nr. 3087