Dem erwierdigenn geistlichnn herrnn herrn Johannsnn abbt zw Lambach unnsern genadigen herrnn, enpeut ich Guetmichel zw Ernstperig, und ich Jorig zw Pyrhach, und ich Taman sein prueder, dafur ich mich obgenantter Jorig anymb wen der nicht pey lanndt ist, unnd ich Kathrei ir swester, unnd ich Taman Pranntz zw Altenshaym, unnd ich Margreth des Weber zw Tayttenshaym eliche hausfraw unser willig und gehorsam dienst bevor. Wier fuegen ewern genaden zw wyssenn, das wir recht unnd redlich verkauft und kauflich zw kauffenn geben haben unnserm lieben pruedern unnd vettern Michelnn zw Ernstperig, der Sneiderin zw Ernstperig saling sunn, Katherina seynner hausfraun unnd allen iren paiden eriben allen unnsern geleichen eribtail, so wir ungeverlich gehabt haben an der Seyringer hueb zw Ernstperig mit aller ir zuegehorung unnd pringt das viertail, das aus unnd inn dem drittaill aus dem viertail ist, dew obgenandt Kathrey, des Micheln hausfraw geleicher kaufferin und in dez ain drittail nicht, und die obgenandt hueb ist dienstpar ewrn genaden und ewern genaden gotzhaus zw Lambach umb ain suma gelt, der wir von in zw rechtten tagen an allen schaden recht und redlich schon bezalt sein worden, unnd sennden ewern genaden darumben dew offen petzettel, das ewr genad dez obgenantten unnsern lieben prueder und vettern, seynner hausfrauen und irn baiden eriben brieff und sigel und ganncze stat darumben gebt. Und wen den ewr genad das alzo gethan hat, so geloben wir ewrn genaden und ewern genaden gotzhauss brieff und sigel, auch vertigung nichtz zw reden noch anders yemandt von unsern wegen pey unsern treun aydes weys angevor. Wir verczeichenn uns auch des obgenantten unnsers geleichenn eribtaill fur unns unnd all unnser eriben in ewigew furzicht, das wir darzue noch darnach kain zuespruch noch vodrungenn nymermer sollenn noch wellenn haben weder mit recht noch an recht geistlichenn noch weltlichem noch anders yemandt vonn unnsern wegenn alles treulich ungeverlich. Unnd sennden ewern genaden darumben dew offen petzettel bewardt durich unnser vleissigen gepet willen mit der erbern weysenn Michelnn Haslinger zw Obernnholczhaym, ambtman der obgenantten herschaft unnd Hannsenn Haslinger, aynner des ratz und burger zw Swanns, payder aufgedruchtten petschadt, doch in und irn baiden eriben auch der herschaft an irm diensten und vodrungen unvergriffenlich und an schadenn, untter dew petschadt wir unns all obgenandt fur unns unnd all unnser eriben pey unnsern treun verpintten alles war unnd stat zw haltten inhalt der zettel. Zeugen unnd gepet umb die petschadt auch umb das insigel an den kaufbrieff sind die erbern Wolfgang zw Ernstperig, Leonhart Schuester daselbs, Sigmundt zw Lebraczhaym unnd annder erber lewtt meniger. Geben nach Cristi unnsers lieben herrenn gepuerdt tausent vierhundert unnd darnach im vier unnd achzigistten jar an phincztag vor sand Veitstag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 100f, Nr. 3088