Ich brueder Anndree, dyeczeitt prior, und wir der ganncz connvenntt des wirdigen gotshaws und klosters zw Lambach sannd Benedikchten orden, bekennen und thuen kundt offennlich mit dem brieff allen, den er furkumpt. Alls der erwirdig und geistlich unnser lieber herr und vatter herr Johanns, abbt zw Lambach den edlln Pillgreimen Sachsen zw Albmegk mit ladung und recht furgenomen hat vor dem wolgeporenn herren hern Pernnharttn von Scharffennberg alls lanndthawpptman ob der Enns von wegen der vischwayd auff der Albm, auch gegen dem edlln Gorigen Kirichperger zw Egennperg von wegen der benantn vischwayd auff der Albm in recht gestanndn und solich recht noch nicht zw enndt und austrag komen ist, wye dann die selben ladung und recht ir gestallt haben in solhem und allem annderm unnser und unnsers gotshaws notturfften und sachen wie dye genentt sein oder wurden gegen wem und umb was lay hanndl das sein wurd nichts ausgenomen, es sey mit ladungen rechten oder andern gestallten darczue er unnsers gewallts bedurffundt ist oder wirdett, haben wir obgenantter convenntt unnsern gannczen und volmachtigen gewallt gebenn und pevolhen geben und pevelhenn den auch hiemit in krafft des brieffs dem obgenanttn erwirdigen geistlichn unnserm lieben herren und vattern dem abbt von dato des brieff, sechs ganncze jar nagst nacheinander koment angevar solich ladung und recht auch all ander sachen uns antreffundt an unnser statt und in unnserm namen ze hanndeln ze vollfuern, es sey in der guettigkayt oder mit dem rechtn zw gewing, zw verlusst und zw allem rechten in aller mass und gestallt, alls ob wir zw yeder czeytt selbs personnleich da waren tatten, tuen solltn oder mochtn. Es mag auch sein wirdigkait solhenn gewallt verrer ubergebn wider an sich nemen als offt sein wirdigkayt will und ym nott tuett und was sein wirdigkayt oder sein weyter gewalltrager in dem allen hanndeln tuen oder lassen, ist alles unnser gueter will und wortt, und wellen auch das alles stat hallten und ob seiner wirdigkait icht wer gewallts nott thuen wurde dann hye inn geschriben ist, wellen wir im nach form gewonhayt und gelegenhayt eins yedn rechtn und ander unnser sachenn hiemit an all verwartt und abganng gannczlich gegebn haben getrewlich und gevarlich. Zw urkund geben wir des also den offenn brieff besiglltn mit unnserm des convenntts anhanngundm insigill, und zw pesser sicherhaytt und geczeugnuss haben wir mit vleyss gepetten den edllen vesstenn Hannsen Payssen zw Mitterperg, das er sein innsigl zw sampt uns an den brieff gehanngen hat, doch im und sein erben an schadenn. Geschehen alls man zallt nach Cristi unnsers liebn herrn gepurd vierczehenn hundertt und im vier und achczigistenn jaren an sambstag nach sannd Panngraczen tag des heyligen martrar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 95-97, Nr. 3085