Wir Johanns von gotts genaden abbt zw Lambach bekennen und thuen kundt offennlich mit dem brief allen den er furkumpt. Alls wir den edlln Pillgreimen Sachsen zw Albmegk mit ladung und recht in der hawptmanschaft ob der Enns furgenomen haben von wegen der vischwaid auf der Albm, wie dann die selben ladunng klarlichenn innhallten, in solhenn habenn wir unnsern gannczen vollmachtigen gewallt geben und pevolhenn und mit sampt den verschribenn gewallt, so wir von unserm connvent haben, gebenn und pevelhenn den auch hiemt in krafft des brieffs dem erbernn Connczen Puchler, burger zw Lynncz solich ladung und recht an unnser statt und in in unserm namen ze hanndeln ze vollfuern zw gewing, zw verlust und zw allem rechten in aller mass und gestallt alls wir zw jeder czeitt selbs personndlich da waren tatten, thuen sollten oder mochten. Er mag auch solhenn gewallt verrar ubergebn wider an sich nemen alls offt er will und und im not thuen wurde, und was er oder ir weytter gewallthaber darin hanndeln thuen und lassenn ist unnser gueter will, wellen auch das statt halltenn und ob im icht mer gewallts nott thuen wurde dann hierinn geschribenn ist, wellen wir im nach forem gewonnhaitt und gelegennhait ain jeden rechten hiemit an all verwartt und abganngk gannczlich gegeben haben. Wir hallten uns auch pevor solhenn gewallt wider umb an uns zw ervodern unnd zw nemen selbs nach unnserm guett bedenkchen darin zw hanndeln alls offt das zw schullden kumpt angevar. Mit urkundt des brieffs untter unnserm aufgedrukchten innsigel, so haben wir zw geczeugnuss gepetten den edlln und vesstenn Hannsen Payssenn zw Mitterperg, das er sein innsigl zw sampt unns auf den brieff gedrukcht hatt, doch im und sein erben an schaden. Geschehenn an sambcztag nach sand Panngraczen tag anno domini im vier und achczigistenn jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 97f, Nr. 3086