In dem namen des herren, amen. Wir Leonhart von Gots genadn brobst zw sannd Florian, bekennen unnd tun kund allen und yedlichen, die das gegennburtig vidimus exemplar und transsumbt ansehennt, lesen oder horennt, das fur unns in beywesen des unndengeschriben notari und der zewgen dabey komen ist der erwirdig in Got vater und herr herr Johanns, abbt zw Lambach, und hat fur unns bracht ainen dewtschen brief auf pergamen geschriben mit dreyn scheibligen insigilln an pergamenen pressel gehanngen ververtigt unnd haben denselben brief mitsambt dem unden geschriben notari und auch den zewgen vleissigklich beschawet, unnd haben den angeschrift pergamen unnd insigelln unczebrochen, unabgeschaben, unvermayligt und an arckhwan ganncz gerecht erfunden. Darauf patt unns der obgemelt herr Johanns, abbt zw Lambach, das wir im daruber ain vidimus unnd transsumbt geruechen ze geben nach innhalt des bemelten hawbtbriefs, der dann von wort zw wort nichts mynder noch mer lautet also. Es folgt die Urkunde von 1418 VI 05 Unnd alls wir obgenanter brobst mitsambt dem undengeschriben notari und den zewgen den yetz bestimbten brief also gancz gerecht gefunden naben und den mit vleis beschawet, haben wir das gegenburtig vidimus daruber geschaft ze machen und in ain offenn instrument bringen lassen, das dann in allen artickeln und punckten geleich mit dem hawbtbrief lauttet und im auch im rechten und ausserhalb rechten auch an aller stat genntzleich gelawbt werden soll in aller mass unnd form als dem vorgemelten hawbtbrief, und des zw urkund unnd zewgnuss haben wir das gegenburtig vidimus mit unnserm anhanngunden insigill besigilln unnd bestetten lassen. Geben zw sannd Forian als man zallt nach Cristi gepurd tausent vierhundert unnd in dem vierundachtzigisten jaren des funftzehenten tags des monats october genant in beywesen der geistlichen unnit erbern Leonhart Rewschl unnd Matheus Wolfsoder, briester Passawer bistumbs zw zewgen der sachen ervordert unnd gepeten. () Notarssignet des Thomas Obenander

Und ich Thoman Obenander, briester Regennspurger bistummbs, von kaiserlichem gewalt gesworen und offner notari, wann ich pei solicher furbringung des obgeschribenn briefs besichtung und beschawung, und pei allen anderen obgeschriben dingen mit sambt den obgestimbtenn zeugen selb personlich gewesenn pin, auch alle und yede ding vor mir also beschehenn, darumb hab ich ditz offenn instrumennt und vidimus daruber gemacht und durch ains andren hannt neulich beschreiben lassenn, mich unnder geschribenn und in dise offene form bracht mit meinem gewandlichen zaichenn und item bezaichennt zu zeucknuss und gelaubenn aller und yedlicher obgeschribner ding.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 115f, Nr. 3100