Wir Fridreich von gots gnaden romischer kaiser in allenn tzeiten merer des reichs zu Hungern, Dalmacien, Croacien etc. kunig, herczog zu Osterreich, zw Steir etc. embieten unserm getrewn Jorigen Kirchperger zu Egenperg unnser gnad und alles gut. Unns hat der ersam geistlich unnser lieber andechtiger n. der abbt zu Lambach anbracht, wie du im an seiner und seins gotshaws vischwaid auf der Albem irrung und ingriff tust und nach denn bevelh darauf vischen lassest, des er schaden neme, emphelhen wir dir ernstlich, daz du dem benannten von Lambach die berurt seins gotshaus vischwaid ungeiret vollgen lassest und in umb solh ingriff benugig machest on verziehen. Hiettest du aber darin icht inred, alsdann von hewt uber vierzehen tag fur unns komest und dich darumb gen demselben von Lambach verantwurttest, so wellen wir die sachen horn oder schaffen ze horn und darinn recht ergeen lassen. Geben zu Lynntz an eritag nach dem suntag Letare in der vassten anno domini etc. lxxxv unsers kaisertumbs im drew und dreissigisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 130f, Nr. 3111