Dem erwirdigenn in Gott und geistlichenn herren hern Johannsen, abbt zw Lambach meinem genadigenn herren, embeutt ich Margrett, Gorigenn Kayser, burger zw Aschach eliche hausfraw, unnd Kathrein, weylentt Gabrielln Pranntmayr hausfraw saling elichen tochter, mein willig dinst zuvor und fueg ewrn gnadn zw wissenn, das ich mit wolbedachtem muett und guetem willen recht und redlichenn verkaufft hab meinem liebenn vetternn Wolfganngen Videllperger, seiner hausfrau Anna und allen iren baiden erbenn all mein muetterliche erbschafft und gerechtigkaitt, so ich ungevarlichenn gehabt hab an dem guett auf dem Videllperg mit seiner zuegehorung, gelegenn in Wellser pfarr, das dann ewrn gnaden und ewr gnaden goczhaus urbar und dinstparigs guett ist, wann mir der genantt mein vetter ain ganncz und volligs benuegen dar umb gethann hat, bit ich ewr gnad mit sunderm vleiss wellet in ainen genuesamen kauffbrieff nach gewonnhait ewrn gnaden goczhaus mit ewr gnadenn innsigel verttigen und gebenn, so das beschehenn ist, glob ich ewrn gnaden hiemit in krafft des brieffs furpaser in ewr gnaden innsigl und verttigunng nicht zw redenn noch da wider ze thuen, sunder das mit allem vleiss umb ewr gnad verdienn, und des zw urkund sennden wir ewrn gnaden den offenn pett brieff, versorigtt mit des obgenantten meines liebm hauswirtts Gorigen Kayser aigen aufgedrukchten petschafft, der das durch meiner pett und an meiner statt auf den brieff gedrukcht hatt, und zw pesser sicherhait und geczeugnuss hab ich mit vleiss gepetten den erbernn weisen Wolfganngen Oder, burger und ainer des gesworenn ratts zw Aschach, das der sein pettschafft zw sampt meinem hauswirtt auf den brief gedrukcht hat, doch im und sein erben an schadenn, daruntter ich mich obgenantte Margrett fur mich und all mein erbenn verpindt alles war und statt ze hallten, innhallt des brieffs, der gebenn ist an sunttag Reminiscere in der vasstenn anno domini im funnff und achczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 127f, Nr. 3109