Dem er[wirdigen und] geistlichen [herrn] herrnn Johannsenn abbt zw Lambach unserm genadigen herrnn empewt ich Wolffganng Wuffinger, purger zw Swanns, unnd ich Hanns sein bruder und ich Anna ir swester, Casparn Pekchn zw Wolffekch elichenn hausfraun, unnser willig unnd gehorsam dienst bevor. Wier fuegen ewrn genaden zw wissen, das wir recht unnd redlich verkaufft und kauflich zw kauffenn gebenn haben unnsernn liebn vettern unnd muemen Joringen Heftperger zw Nydernheftperig aus Kaspalczhoffer pharr, unnserm swager Hannsen Hochennperger zw Hachenperg auss Mekchennhoffer pharr, Helena seynner hausfraun unnd allenn irnn obgenantten paiden eriben, dew sy habenn oder noch chunftigklich gewingen, unnser funfftaill, so wir obgenandt gehabt haben an der halben hueb zw Hochenperig inn Mekchenn hoffer phar mit aller zuegehorrung und gehort mit der herschafft euch und ewern genaden gotzhauss zue umb ain summa gelt, der wir von in zw rechtten tagen an allen schadenn recht unnd redlich schon bezalt sein worden, unnd sennden ewern genaden darumben dew offenn petzettl, das ir denn obgenantten Joringen unnd Hannsen und irn hausfraun unnd allen iren eriben ein gewondlichen lanndtleuffing kaufbrieff darumb gebt unnd mit ewrn genaden insigel ververtigt unnd bestat. Unnd wen ewr genad den das also gethan hat, so geloben wir euch und ewrn genaden gotzhauss inn ewr brieff unnd sigel auch vertigung nichtz zw reden noch annders yemand vonn unnsern wegen pei unnsern treuen aides weis angevor. Wir verczeichen unns auch des obgenantten funfftaill an der obgenantten halben hueb mit aller seinner zuegehorung fur unns unnd all unnser eriben inn ewigew furczicht, das wir darzue noch darnach kain zuespruch noch vodrungen nymermer sollen noch wellen haben weder mit recht noch an recht inn kaynerlai weys ausgenomen, unss geb den der tod icht rechtlich, des verczeich wir unns nicht alles treulich ungeverlich. Unnd geben ewrn genaden darumben dew offenn petzettel bewardt durich unnser vleissigen gepet willen mit der erbern weysenn Mertt Wuffinger, ayner des ratz unnd purger zw Swanns, unnd Michel Huetter, burger daselbs, paider aufgedrukchtten petschadt, doch in und irn paiden eriben an schaden, daruntter wir unns obgenandt mit unnsern treun aides weys verpintten, alles war unnd stat zw haltten innhalt der zettl. Zeugenn unnd gepett umb dew petschadt auch umb das insigel an den kaufbrieff sind die erbern Sigmundt Kreuss, Wolfganng Mair, Jorig Pekch all drei burger zw Swanns unnd annder erber lewtt meniger. Geben nach Cristi gepurdt tausent vierhundert unnd darnach im funffundachzigisten jar an eritag in den heyling osterfeirtagenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 133f, Nr. 3113