Dem erwierdigen in Got und geystlichen herrenn hern Johanns abt zu Lambach meinem genadigen herren ennpewt ich Lienhart, Hannsen Fleischacker weylennd zu Wielting saligen sun, mein gehorsam dinst wevor und fueg ewren genaden zu wissenn, das ich verkauft hab ains staten ewigen kaufs meinen lieben geswistretenn Taman, Wolfgang, Margreten Breyden, Ursula und allen iren erbenn all mein erbschaft und gerechtikayt, so ich gehabt hab an dem guet zu Wielting, da unser obgenanter vater saliger aufgesessen ist mit allen zugehoren nichcz ausgenomen, gelegen in Gebolczkircher pfarr in Starchenberger gericht, und ist erb von ewren genaden und von dem goczhaws Lambach, darumben in dann von mir brief und sigil gesprochen ist worden. Hieinnen pitt ich ewr genad mit diemuetigem fleys, ir wellet in einen kawfbrief mit ewrem insigel daruber vertigen, das ist mein gueter wille, gunst und wissen hinfur an alle widerred, und gelob auch bey meinem ayd und trewen ieczo noch hinfur nichcz dawider zu reden, zu sprechen noch zu vodern habenn weder mitt geystlichem noch weltlichem rechten noch sunst an recht in kaynerlay weys angevar. Des zu urchundt geben wir den offen pettbrieff under des erberen Hanns Mullechner ewrer genaden ambtman aufgedruckten pettschaft, den ich mit, fleys dar umben gepeten hab, im und sein erben an schaden, dar under ich mich obgenanter Lienhart mit mein trewen an aydes stat verpinden alles das war und stat zu halten inhalt des briefs. Zewgen der gepett umb das pettschaft sein dy erberen Lienhart Schneyder zu Gebolczkirchen, Michel Zawner zu Zayseltnig. Geben an pfincztag nach dem heyligen Ostertag anno domini etc. lxxxv jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 134f, Nr. 3114