Wir Fridreich von gots gnaden romischer kaiser zu allen tzeiten merer des reichs zu Hungern, Dalmacien, Croacien etc. kunig, hertzog zu Osterreich, zu Steir etc. embieten unserm getrewen Jorigen Khirchperger zu Egenperg unnser gnad und alles gut. Als wir dir vormals geschriben und bevolhen haben auf hewt fur unns ze komen, und dich gen dem ersamen geistlichen unserm lieben andechtigen n. dem abbt zu Lambach zu veranntwurtten, der unns hat anbracht, wie du im an seiner und seins gothaws vischwaid auf der Albem irrung und ingriff tust, und nach denn bevelh darauf vischen lassest, des er schaden neme, da du aber nicht komen bist, emphelhen wir dir ernstlich, daz du dem benannten von Lambach die berurt seins gotshauss vischwaid ungestert volligen lassest, und in umb solh ingriff benugig machest on verziehen, hiettest du aber darinn recht inred, alsdann noch von hewt uber vierzehen tag fur unns komest und dich darumb gen im veranntwurttest, so wellen wir die sachen horn oder schaffen ze horen und darinn recht ergeen lassen. Kembst du aber nicht, so wollen wir dennoch dem anndern tail recht ergeen lassen. Geben zu Lynntz an eritag nach dem suntag Quasimodogeniti anno domini etc. lxxxv unsers kaisertumbs im vier und dreissigisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 135f, Nr. 3115