Erwirdiger geistlicher herr mein dienst in gutm willn bevor. Mein herrn den hawbtman habend die erbern weisn n. der richter und ratte zu Wels anbringen lassenn, wie ir ettlich der irn mit recht von stewr wegen, die ir von den lehen, so sy von euch haben an sew ervordert furnembt, des sy sich nach dem sy dafur gefreit sein, in ain beswert beduncken und mein herrn darauf gepetn, solh recht abzestellen schaffen, darauf hat mir der bemelt mein herr bevolhen, euch dorumb zu schreiben, das ir das bemelt recht auf viertzehen tag anstellet und darumb auf den montag nach sand Symonstag yetz kunftig her fur den benantn mein herrn oder sein anwald komet, da die von Wels auch sein werdn, so wirdet man die sachen horn und darin hanndlen als vil gepurlich ist, dem wellet allso nach gen. Datum Lynntz an suntag vor sand Symon und Judas tag anno domini lxxxv^to

Pilgreim Walh verweser des hawbtmanschaft ob der Enns